“‘L’home les caparines’ ye una novela de realismu máxicu que fala de les lleendes qu’hai nos pueblos y la superstición”, esplica Blanca Fernández

“La novelista más moza de les lletres asturianes”, como recordó Nicolás Bardio, responsable de la editorial Radagast, presentó esti xueves la obra que-y da esti ‘títulu’ a Blanca Fernández, ‘L’home les caparines’. “Ye una novela de realismu máxicu que fala de les lleendes qu’hai nos pueblos y la superstición”, esplicó la yerbata, que deseó “que’l mio reináu sía breve y venga daquién rápido detrás”.

El llocal de Cuatro Gotes Producciones nel barriu xixonés de L’Arena acoyó l’actu, al qu’acudió’l direutor xeneral de Política Llingüística, Antón García. Inaciu Galán fixo de conductor, introduciendo a Fernández y celebrando que “tenemos una nueva novela firmada por una muyer, que na lliteratura asturiana ye un fechu especialmente relevante” magar que la primera escrita conocida sía d’Enriqueta González Rubín, ‘Viaxe del Tíu Pacho el Sordu a Uviedo’, asoleyada nel añu 1875.

“Ye un día importante porque non tolos díes se presenta una novela”, siguió Bardio, “porque non tolos díes presenta una novela una muyer, y non tolos díes presenta una novela la novelista más moza de les lletres asturianes. Ye un día triplemente importante”. L’editor defendió la esistencia de subvenciones “pa facer avanzar la llingua”, pero rescampló la importancia de les iniciatives privaes, como la espublización d’esta novela, “que dan respuesta a una demanda real de noveles n’asturianu”, avanzando que la metá de la edición de ‘L’home les caparines’ “yá ta distribuyida y vendida” al tener una gran demanda nesta Selmana de les Lletres Asturianes.

Esta obra, apuntó l’autora, tuvo’l so niciu hai 10 años, “cuando tenía 17 años, momentu nel que la escribí en versión rellatu. Y ye un rellatu al que-y toi peragradecida porque gracies a él punxéronme en contautu con Formientu y conocí a muncha xente”. Años depués “yá me sentí cola capacidá de facer dalgo más llargo y foi cuando entamé a da-y el tresfondu que-y faltaba al primer rellatu”.

Aficionada a la lliteratura hispanoamericana, Fernández apunta que la so obra “ye una novela de realismu máxicu, anque dalgunos me dicen que ye más de fantasía o de terror, que fala de les lleendes qu’hai nos pueblos y la superstición”. Sobre la historia, adelantó que trata de “Alicia, una moza que ta acabando l’institutu y que piensa que llega’l branu y va ser el branu de la mio vida, pero que s’alcuentra que muerre la güela unos díes enantes”.

Nesi momentu descubren qu’esta muyer, “una persona d’armes tomar, que taba siempre investigando”, dexó-yos una casa alquilada “nun pueblu que se llama Fontoria”. “Deciden dir ellí a conocelo y lo primero qu’alcuentren ye qu’hai una lleenda que diz que cuando ves una caparina, quédente trés díes pa morrer”, avanzó.

Otra novela pal añu qu’entra

Entrugada pol motivu de que salgan poques noveles ente la xente más mozo, Fernández apuntó que “una novela lleva tiempu”, lo que fai que les persones que se tean formando nun dispongan d’hores nel día pa ello. Sicasí deseó “que’l mio reináu sía breve y venga daquién rápido detrás de min, porque ye daqué que m’esmolez y que me da pena. Nun m’esperaba que con 27 años fora la novelista más moza”, anque llueu dixo que tien constancia de la esistencia de delles persones más xóvenes qu’ella escribiendo.

De momento, l’añu qu’entra la escritora de Bimenes va asoleyar la so segunda novela, 'Trovadoresca', ganadora del I Premiu Radagast de Novela Fantástica, Ciencia Ficción y Terror, destináu a menores de 35 años. Una historia de fantasía urbana que s'asitia nun tiempu presente pero que cuenta con elementos máxicos y sobrenaturales.

L’actu siguió tratando delles temes como l’asignatura d’asturianu, al ser Fernández docente, y los vezos de llectura ente los adolescentes; los premios lliterarios, qu’incorporen el Premiu Enriqueta González Rubín de narrativa p’autores moces y mozos menores de 30 años esti segundu semetre; la importancia de les revistes lliteraries pa la xente qu’empieza na escritura; o los sos próximos proyeutos. “Nesti 2021 toi col envís de sacar lo que tengo nel caxón ensin acabar y a ver si lo acabo. El tiempu lo dirá”, avanzó la yerbata, que confirmó que ta volviendo otra vegada a escribir rellatos.

Na semeya Galán, Fernández y Bardio.