L'Euru y l'Ibex-35 na zona de máximos

El mes de payares ta poniéndose como ún de los más rentables en bolsa, y, según s'allega'l 2005 los parqués tan tirando p'arriba pelos índices. La comunidá inversora paez que nun tien duldes nel apueste pola renta variable. L'anuncia de la selmana foi'l trunfu del republicanu George W. Bush, fechu que nun afectó negativamente a los mercaos bursátiles. Sicasí foi la divisa norteamericana la que más notó'l resultáu electoral con perdes nel mercáu de divises.

La creación d'emplegu nos Estaos Xuníos nel mes d'ochobre foi'l datu más importante la selmana pasada. Los 337.000 nuevos puestos de trabayu al otru llau del Atlánticu sofitaron de les xubes nes principales bolses. Xunta esti datu tamién diose anuncia de la tasa de desempléu qu'algamó un 5,5%. Na Zona Euru, la producción industrial de setiembre d'Alemaña cayó'l 1,2% cuando se contaba con un datu positivu del 0,5%. A la contra, bon datu de la producción industrial de setiembre n'España con una xuba del 3,5% mentanto que los economistes esperaben un 2,8% más.

Les bolses de Nueva York pesllaron en positivo algamando los meyores resultaos en trece meses. L'índiz Dow Jones medró un 0,71% hasta los 10.387,54 puntos mentanto que'l tecnolóxicu Nasdaq peslló nos 2.038,94 puntos con una xuba del 0,76%.

L'Ibex-35 algamó la cota más alta nos últimos trés años con 8.570,60 puntos lo que supón medrar un 1,8% nel conxuntu de la selmana. La cayida del preciu del barril Brent, los perbonos datos d'emplegu de los Estaos Xuníos y l'interés de los inversores en pesllar un añu en positivo tiraron p'arriba pela Bolsa de Madrid. Nel terrén de les xubes destacaron Iberia, Sogecable, ACS, Telefónica, SCH y Corporación Mapfre. Les perdes más abultaes foron pa Rede Eléctrica ya qu'a lo llargo de la selmana pasada'l valor marcó máximos históricos y el vienres los inversores recoyeron beneficios.

Máximos históricos del euru respective a la divisa norteamericana. Dempués del trunfu de George Bush los inversores entamaron a mercar divisa europeo énte la confirmación de la continuación de la política d'Estaos Xuníos d'un dólar feble. La divisa europea asítiase nos 1,2945 dólares. Nel mercáu de renta fixo los bonos tuvieron una selmana en positivo, algamando'l bund alemán a diez años una rentabilidá del 3,89%. Cayida del preciu del petroleu énte una meyora de la coxuntura internacional y un frenu técnicu dempués de delles selmanes en xuba llibre. El barril Brent foi'l que más baxó, un 3%, hasta asitiase perbaxo los 46 dólares