L'euru fai un históricu énte'l dólar

La Bolsa de Madrid vive yá'l tradicional rally alcista de fin d'añu. Asina, el selectivu Ibex-35 tuvo una selmana onde algamó dellos máximos añales ente un petroleu, un euru y un oru que nun tienen tope. Los inversores tan a la gueta de pesllar el meyor exerciciu bursátil en cuatro años anque entovía siguen ehí les duldes macroeconómiques. El presidente de la Reserva Federal, Alan Greenspan, foi l'únicu que pudo frenar la xuba llibre de les bolses cola so anuncia del peligru que supón l'altu déficit comercial norteamericanu y los riesgos presupuestarios de la primer potencial económica.

Dempués d'una selmana de xubes, el vienres les bolses nun foron a caltener l'apueste inversor. Esto xunta les anuncies d'Alan Greenspan tiraron p'abaxo pelos índices el vienres. Wall Street tuvo una bona selmana pero'l pieslle negativu del vienres dexó'l Dow Jones con -1,09% y el Nasdaq en -1,6%. Nel Vieyu Continente les inversiones nun pintaron meyor, y Francfort, Londres y París tuvieron cayíes ente'l 1,05% y el 0,83%.

El pieslle del Ibex-35 tuvo mui cerca de los máximos añales anque les ventes llevaron al índiz de la Bolsa de Madrid a los 8.625,90 puntos. El volume de negociu foi altu, alrodiu los 2.335 millones d'euros. Ente los valores que más xubieron: Zeltia y Repsol. Nel llau de les perdes destacó Telefónica xunto con Arcelor, BBVA, Iberia y Prisa.

L'oru prieto sigue peles ñubes y nun-yos da fuelgu a los brokers. El barril Brent asitióse nos 43,52 dólares. La inestabilidá d'Iraq y el casu Yukos siguen siendo les escuses de los especuladores pa caltener precios mui altos. El casu ye que los sectores importador, enerxéticu y de los tresportes ya entamaron a treslladar la xuba a los precios finales. L'añu qu'entra la inflación de munchos países va vese afectada de forma importante por ello. Tamién l'oru mariello ta xubiendo asgaya, algamando un preciu penriba los 447 dólares onza. Los analistes apunten a una cayida temporal nel preciu del oru pola venta del Gobiernu Francés de 600 tonelaes d'oru pa baxar la deuda del país.

Ablucante xuba de la divisa europea que ta sobrepasando toles estimaciones de los analistes. L'euru ya val 1,3051 dólares mentanto que los economistes apunten a un cambéu alegáu a la rellación de 1,5 dólares unidá. El sector esportador na Zona Euru yá ta viendo menguar la so actividá mentanto que'l dólar nun da síntomes de frenar la so cayida llibre nos mercaos. Nel mercáu de renta los bonos a llargu plazu tan teniendo una rentabilidá cada vegada menor con bien diz el 3,784% de rentabilidá del bund alemán a diez años. El preciu de los bonos nun para de xubir, y como'l preciu de los bonos y la so rentabilidá son inversos, los inversores ta dexando de llau'l mercau de renta fixo énte una renta variable con meyores perspectives.