L'etnográficu de Porrúa faise con una colección de grabaos asturianos del sieglu XIX

Una representación de venti miembros del Conceyu pa'l Usu y promoción del Traxe'l País "La
Corexa" ficieron una amuesa d'indumentaria tradicional asturiana nel Muséu
Etnográficu del Oriente d'Asturies, en Porrúa (Llanes), el sábadu pasáu,
con motivu de la inauguración d'una esposición de grabaos orixinales sobre
esti tema, adquiríos en subasta pública'n Madrid.

Dase'l casu de que la
subasta de grabaos d'esta triba ye daqué enforma raro nes cases de subastes y
el Muséu de Porrúa nun quixo dexar pasar la oportunidá de facése con un
material gráficu de tala entidá. Jorge Mochales López, ún de los responsables del Muséu, comenta que la posibilidá de facese colos grabaos vieno gracies a ún de los miembros del patronatu de la Institución, quien tuvo conocimientu de que na casa de subastes Frame de Madrid diba ponese a la venta un conxuntu de grabaos orixinales de los sieglos XVIII al XX rellacionaos con temes de xeografía, arquitectura y costumes populares. La sorpresa vieno cuando se vio que munchos d'aquellos grabaos yeren de temática asturiana, lo que llevó al etnográficu de Porrúa a puyar por un total de 14 d'aquellos grabaos que se refereíen esclusivamente a vestimenta y traxes populares, que son los que puen vese agora nel muséu llaniscu. la inversión total nestos grabaos foi de más de 1.300 euros, una cantidá grande pa un muséu de presupuestu reducíu, pero una bona inversión museística

Ente los 14 grabaos, toos ellos orixinales, hai pieces de Cuevas y trés exemplares d'una colección francesa de traxes d'Europa fecha pol ilustrador Pigal, un de los grandes de la estampa francesa decimonónica xunta Giraudet o Gavarni. Les pieces más vieyes son d'últimos del sieglu XVIII, mientres que les más modernes, de primeros del XX, presenten yá, según esplica Jorge Mochales, una tendencia a la idealización del traxe típicu normal naquella época. Sacantes les dos pieces de Cuevas, tolos grabaos son desconocíos mayormente pal públicu asturianu, y ente les técniques que s'emplegaron nellos hai litografíes y aguatintes

Con motivu de la inauguración, amás de la representación de los traxes, los miembros de La Corexa dieron tamién una conferencia que contó con un públicu
mui numberosu y interesáu que permitió un llargu alderique final sobre
aspeutos históricos y sociales d'esti tema que, como quedó claro na
presentación de La Corexa, ye parte importante del patrimoniu históricu
del país y afecta directamente a temes identitarios. Nesti sentíu, la Corexa
trabaya pa que'l traxe del país algame un prestixu social qu'afite'l so
usu actual como traxe de gala de los asturianos y nun se vea arrequexáu al
usu esclusivu de grupos de folclor.
Más información nel web de La Corexa y del Etnográficu de Porrúa