L'estrañu casu del faisán suicida

El númberu del mes de mayu de la revista "Ambienta" qu'edita'l Ministeriu de Mediu Ambiente presenta un artículu nel que se fala del Faisán Montés, la especie en peligru d'estinción que lleva acaparando titulares na prensa dende va meses. L'artículu diz que'l faisán "pue facese a la presencia humana (anque en celu pue llegar a atacar), pero dende va tiempu la población d'esta especie va menguando" Ente les causes pa esplicar esta baxada poblacional, la revista acusa la tresformación de viesca natural n'esplotaciones madereres que desanicien l'habitat natural de la especie.

Hasta equí va too más o menos bien, pero ello ye que, aparte de pol ataque al mediu ambiente, pa la revista del ministeriu'l faisán tamién ta perdiendo presencia pola "torpeza" propia del animal. Asina afírmase que'l faisán "anque llevanta con munchu impulsu, vuela mal y acaba estrellándose y partiendo'l pescuezu".

Xunta esta ablayante afirmación, la revista oficial diz que'l Faisán garra'l nome (urogallo) de la semeyanza de los glayíos que da'l faisán (que nun llevanta mediu metru del suelu) en tiempu del celu colos berros del "uro" una especie d'herbívoru asemeyáu a les vaques que desapaeció va muncho de la tierra.