L'Estáu quier aforrar 13.000 millones d'euros en corriente

El gobiernu español presentó la otra selmana la Directiva E-4 o "estratexa d'Aforru y Eficiencia Enerxético 2004 - 2012" documentu marcu col que'l gobiernu pretende enfrentar la necesidá d'aforrar nel consumu d'ellectricidá énte un consumu que nun para d'espoxigar esponencialmente un añu tres d'otru. L'estáu propón cola E-4 un aforru total de 12.853 millones d'euros nel recibu de la lluz al traviés de la reducción del consumu d'enerxía, y la mengua de les emisiones de CO2, potenciando les enerxíes llimpias y la diversificación de les fontes d'enerxía.

Sicasí, la E-4 nun tien el preste del movimientu ecoloxista. Colectivos ecoloxistes de la importancia de Greenpeace, WWF/Adena y Ecoloxistes n'Acción denunciaron gúei que la e-4 ye curtia d'obxetivos, vien con retrasu y arreniega de los oxetivos que manada'l protocolu de Kyoto. Según estes organizaciones, la E4 nun va conseguir que mengüe'l gastu de corriente, y que como muncho va lograr que'l consumu d'ellectricidá "creza más despacio". Según les tres organizaciones, la E4 lleva tapecía dientro d'ella una xuba del gastu enerxétticu del 39,6% (pasando a consumir de 125 Millones
de tonelaes equivalentes de petróleu nel 2000 a 165 Mtep nel
2012) y una baxada del 7,2% de la intensidá enerxética primaria (ello ye, la corriente que se precisa consumir pa producir una unidá de Productu Interior Brutu),
ello cuando n'Europa l'oxetivu ye baxar esa intensidá enerxética primaria nel 13% nun plazu más curtiu, d'equíal 2.010 y non al 2.012 como cuenta facer el Gobiernu español. Los ecoloxistes critiquen tamién que la E4 nun se coordine cola Estratexa Española pal
cumplimientu del Protocolu de Kyoto y col Plan d'Infraestructures d'Ellectricidá y Gas, colo que puen construyise infraestructures que dempués nun faigan falta. La falta de detalle de los instrumentos
reglamentarios y normativos pal desarrollu de la E4 ye otru de los fallos bultables que ven los ecoloxistes nella.