“L’Estáu autonómicu sal reforzáu, y la sanidá asturiana en particular”, afirma Barbón

Adrián Barbón aseguró que “l’Estáu autonómicu sal reforzáu, y particularmente la sanidá asturiana sal reforzada, d’esti procesu”. El presidente, que dixo tar “arguyosu de la respuesta asturiana a la crisis sanitaria”, anunció la constitución d’una Comisión Delegada del Gobiernu pa la Reconstrucción y Asuntos Económicos.

Na Conseyería de Salú, tres aconceyar cola plantía del Serviciu de Vixilancia Epidemiolóxica, Barbón dio la so habitual rueda de prensa telématica de los sábados pa informar sobre la situación de la crisis sanitaria pola pandemia de COVID-19. Esplicó que’l motivu d’esti alcuentru yera “conocer de primer persona, acompañando al conseyeru de Salú de Gobiernu del Principáu d’Asturies, a toles persones que dedicaron toos estos meses a un llabor fundamental dende’l puntu de vista de la salú pública y de la vixilancia epidemiolóxica”.

Nesi sen recordó “el papel fundamental de tola investigación previa, la investigación de contautu, la guía de respuesta, a la indicación d’análisis…, a tou un coleutivu d’homes y muyeres que dediquen la totalidá del tiempu, y pa los que nun esisten nin festivos nin descansos, nesta batalla col coronavirus. Por eso yera una visita debida d’agradecimientu y de puesta en valor”.

Darréu, tres llamentar les perdes humanes, rescampló “la gran cantidá de pruebes” feches n’Asturies “que nos asitien a la cabeza de toda España”. Asina recordó que “de 170.000 pruebes que vinimos faciendo, 102.000 son PCR” que l’equipu “col que güei axunté” dirixó con criteriu “a los coleutivos y persones había que-yos facer mayor númberu de pruebes”, esto ye, “más 37.000 al personal sanitariu; 34.500 al personal sociosanitariu y a los residente; o 19.000 a otru tipu de personal esencial”.

Pasu a fase 3

Sobre’l pasu de fase, Barbón apuntó que “ye importante porque significa que n’Asturies vamos dando pasos, poco a poco, prudentes, pero que nos dexen avanzar”. Darréu refirióse al segundu informe del Estudiu de Seroprevalencia, qu’apunta que’l 1,6 por cientu de la población asturiana tuvo contautu col coronavirus SARS-CoV-2, como “un ésitu, porque los que nos vien a dicir d’otra forma, ye que consiguimos tornar la entrada del virus n’Asturies”, comunidá autónoma “con vulnerabilidaes que si’l contaxu fora muncho mayor podría signficar munchos más muertos”.

Por esti motivu, llamó a “la prudencia y a los comportamientos responsables del conxuntu de la ciudadanía” porque “agora sí somos conscientes de que nun podemos baxar la guardia”. Dende’l llunes, col avance 3, Asturies va garrar la xestión del estáu d’alarma hasta’l día 21 y na ‘normalidá nueva’ que llegará nesa fecha si sigue la bona evolución epidemiolóxica.

“Nesi futuru que ta por construyir” Barbón va constituyir una Comisión Delegada del Gobiernu pa la Reconstrucción y Asuntos Económicos, “que ye una posibilidá que recueye l’artículu cuartu de la Llei 8/91 d’Organización de l’Alministración del Principáu d’Asturies”, que “será la encargada de confluyir nella tolos trabayos que se desendolquen en tolos ámbitos: la concertación social, el diálogu con otru tipu d’axentes económicos, el diálogu colos propios partíos al traviés de los Pautos de Fruela…, pa que previamente o na coordinación d’esa comisión delegada se construya la respuesta asturiana a cómo reactivamos la nuesa economía y salimos y siguimos alantre”. Va presidila Juan Cofiño, vicepresidente del Conseyu de Gobierno, y va tar formada por otres trés conseyeros de manera permanente, los de Facienda, Industria, y Ciencia y Innovación “porque ehí ta una de les grandes claves del futuru de la nuesa comunidá autónoma”, y los restantes incoporaránse dependiendo de la materia.

Al respeutu, el presidente emponderó’l papel “fundamental de dinamización y busca de recursos europeos pa ponelos al serviciu d’Asturies” que va xugar la Direición Xeneral d’Asuntos Europeos”. Na so intervención, el socialista tamién reivindicó “l’alcuerdu qu’ayeri firmamos en materia de financiación autonómica, porque ye importante que los partíos demostremos que somos quien a facer renuncies toos en beneficiu d’Asturies”.

“L’Estáu autónomicu ye una realidá que, salvo un partíu políticu esclusivamente, el restu d’organizaciones polítiques d’Asturies tán defendiendo, y ayeri demostráronlo con esi pautu en defensa d’una financiación autonómica”, respondió n’asturianu Barbón a una entruga d’Asturies.com. “L’Estáu autonómicu sal reforzáu, y particularmente la sanidá asturiana sal reforzada, d’esti procesu”, añadió al tiempu que dixo tar “arguyosu de la respuesta asturiana a la crisis sanitaria”.

Sí se decató’l presidente, que destacó que “la xente ye consciente de la respuesta del nuesu Gobiernu, de la Conseyería de Salú nesti aspeutu y del propiu SESPA”, d’una vulnerabilidá, apuntando a “la necesidá” de crear a nivel estatal “una axencia de salú pública que dea respuesta a nivel global y que permita la coordinación de les competencies de les comunidaes autonómes con tol territoriu, pero tamién una respuesta eficaz pa facer frente a esa situación que se plantega”.

Decretu complementariu al estatal

Barbón defendió la so decisión de llegar al final de la fase 3 pa pasar a la ‘normalidá nueva’ “porque val más caleyar pasu ente pasu, y afitar posiciones pa nun tener que dar marcha atrás, que non por allanzar una selmana cometamos errores de los que nos podamos arrepentir”. El llavianés anunció que tán analizando la regulación estatal que concede’l pasu a la fase 3 y que’l “llunes o’l martes” va sacar otru complementariu del Gobiernu d’Asturies que podría facer modificaciones más restrictives, como caltener la llende de 15 pa les xuntes de persones.

No que respeuta a la movilidá con territorios na mesma fase, dixo tamién tar estudiándolo y que les decisiones van tomase “baxo’l prisma de la salú”. “Nada dañaría más la economía d’Asturies que cometer un error en materia sanitaria que creara a un biltu que nun podamos controlar. Eso sí dañaría de manera permanente la economía”, esplicó al tiempu qu’anunció que nin Galicia nin Cantabria se punxeron de manera oficial en contautu con Asturies pa plantegar esta apertura “que depende del Gobiernu d’España”.

Entregáu pola posibilidá de que pueda haber públicu nel derbi asturianu, que podría xugase’l domingu 21 o’l llunes 22, confirmó que pa esa fecha “nun tendríemos competencia nenguna” y que dependerá del alcuerdu ente l’Executivu estatal y LaLiga.

Na imaxe, Barbón, xunto col conseyeru Pablo Ignacio Fernández Muñiz, presiden la xunta cola plantía del Serviciu de Vixilancia Epidemiolóxica. Semeya obra d'Armando Álvarez.