L’escritor Luis Sepúlveda, primer positivu por COVID-19, nun supera la enfermedá

Esti xueves finó’l chilenu Luis Sepúlveda. L’escritor con residencia en Xixón foi la primer persona que dio positivu por COVID-19 n’Asturies, el 29 de febreru, quedando ingresáu nel Hospital Universitariu Central d’Asturies (HUCA), onde nun pudo superar la enfermedá causada pol coronavirus SARS-CoV-2.

Foi tres tornar d’un eventu lliterariu na población portuguesa de Póvoa de Varzim cuando Sepúlveda comenzó a tener un cuadru de neumonía. Tres face-y la prueba, dio positivu por COVID-19, siendo’l primer casu confirmáu n’Asturies.

Dende entós llevaba lluchando por superar esta enfermedá causada pol coronavirus con orixe na ciudá china de Wuhan, pero, depués de mes y mediu, esta mañana venciólu. El chilenu de 70 años dexa un importante llegáu lliterariu, cola obra cume ‘Un viejo que leía novelas de amor’, que tien torna al asturianu fecha por Pilar Fidalgo, y un gran sellu en Xixón, onde s’instaló nel 1997 tres delles participaciones na ‘Semana Negra’ y plaza onde creó’l Salón de Libro Iberoamericano.

Nacíu n’Ovalle nel 1949, Sepúlveda destacó pola so militancia d’izquierda, teniendo que colar de Chile nel 1977 tres el golpe militar d’Augusto Pinochet del 1973, llegando a tar encarceláu. Vivió en dellos países llatinoamericanos enantes de dir a Europa, en concreto a Alemaña, enantes de recalar en Xixón.

Baxen les muertes

La datos oficiales últimos sobre la COVID-19, correspondientes a les 20 hores d’ayeri, rexistraron 2 muertes, la cifra más baxa dende’l 2 d’abril. El total de finaos n’Asturies pola enfermedá causada pol coronavirus SARS-CoV-2 asitiábase asina en 168.

Los positivos nuevos foron 74 p’algamar yá los 2.170 casos nel país. Mentes, la UCI ganó un paciente (61) y en planta hebo cuatro menos (367), con 35 curaciones na xornada pa sumar 522 dende l’entamu del andanciu.

Dende güei, el Gobiernu tien activa una páxina web –namái en castellanu– con tola información en rellación a la pandemia de COVID-19.

Na semeya, Sepúlveda nuna imaxe del 2014.