Les zones rurales queden llibres de llevar mázcara, sacante casos de xentíu

La mázcara ye dende la tarde d’esti martes martes obligatoria n’Asturies independientemente de que se pueda caltener la distancia de seguranza interpersonal de 1,5 metros. Esta midida ye aplicable namái pa zones urbanes, yá que nes rurales namái va haber que llevala si hai una axuntanza grande de xente.

El Conseyu de Gobiernu estraordinariu celebráu na tarde d’ayeri aprobó’l decretu que regula esta midida, aplicada enantes por Catalunya, Illes Balears y Estremaúra y siguíes por otres autonomíes, que nel casu asturianu trai amás delles novedaes que tienen que ver colos aconceyamientos y l’asistencia a espectáculos pa persones que nun conviven xuntes. Darréu espublizábase’l documentu nun suplementu del Boletín Oficial del Principáu d’Asturies (BOPA), entrando asina en vigor.

La obligatoriedá del usu de la mázcara queda pa les víes públiques de zones urbanes pa los mayores de 6 años, yá que nes víes públiques de zones rurales namái va esixise “cuando se produza un xentíu, apreciación que corresponderá a las Fuercies y Cuerpos de Seguridá y a los órganos autonómicos y llocales competentes”. Ésti yera un aspeutu esperáu, daes les carauterístiques d’Asturies.

Imposibilidá d’asistir a espectáculos con collacios

El decretu recomienda tamién “l’anulación y aplazamientu d’actividaes non fundamentales” y pon llende a los aforos en xuntes familiares. Éstes van poder ser de 50 persones n’espacios al aire llibre y de 25 en recintos zarraos.

Mentes, l’asistencia a espectáculos, yá sía culturales o deportivos, va tar marcada pola imposibilidá de poder ocupar asientos pegaos nel casu de nun ser convivientes. La mázcara tamién va ser obligatoria, tanto si ye al aire llibre como nun llocal, mientres dure l’actividá.

Por último, créase, como grupu de trabayu téunico, el Comité Asesor y de Siguimientu de la COVID-19 n’Asturies cola función d’órganu d’asesoramientu y consulta a la Conseyería de Salú “sobre la evolución epidemiolóxica de la COVID-19 y sobre les actuaciones a desendolcar pa proteger la salú de la población”. Va tar formáu por un mínimu de 5 espertos na materia.

Semeya obra d'Armando Álvarez.