Les XXXVIII Xornaes Internacionales d'Estudiu viven la xornada final

Dos ponencies y trés comunicaciones tán programaes pa la tarde d'esti xueves.

Les XXXVIII Xornaes Internacionales d'Estudiu, tres dos díes d'actividá intensa, lleguen al so fin. A les 16 hores va comenzar la xornada final, que va abrir Lucia Molinu, de la Université Toulouse II-Jean Jaurès, cola conferencia ‘Préstamos en asturiano: estudio morfo-fonológico’.

A les 17.30 hores, tres un alderique, van principiar les comunicaciones de Gonzalo Llamedo ('Rompiendo'l silenciu: el puxu del asturianu na sociedá rizomática de güei'), Xuan Lajo ('La lliteratura oral en Senabria') y Claudia Elena Menéndez Fernández (Resultaos del sufixu -ELLU / -ELLA na onomástica de la documentación del Real Hospiciu d'Uviéu, ss XVIII-XIX'). La segunda ponencia del día va ponela, a les 18.45 hores, José Enrique Gargallo, de la Universitat de Barcelona, y va tratar de ‘Refranes meteorológicos del asturleonés en su contexto romance, según los datos de ParemioRom’.

Xosé Antón González Riaño, presidente de l'Academia de la Llingua Asturiana, entidá qu'entama les xornaes, va encargase poner darréu'l pieslle a les mesmes. Éstes celébrense nel salón d’actos del edificiu alministrativu de la Facultá de Filoloxía y Lletres de la Universidá d’Uviéu, nel campus uvieín del Milán, con accesu llibre.