Les xuntes eleutorales d’Asturies, de Xixón y d'Uviéu refuguen escritos n’asturianu y esixen el castellanu

“Deberá presentarlo, en su caso, en idioma oficial” y “presente la solicitud en el idioma oficial: castellano” son les respuestes qu’atopó Andecha Astur a escritos n'asturianu presentaos a la Xunta Eleutoral d’Asturies y de Xixón, de manera respeutiva, al igual que n’Uviéu. La formación fala de “represión llingüística” y Iniciativa pol Asturianu denuncia que ye una “desagradable y gravísima discriminación”.

Andecha Astur nun tuvo problemes en presentar les candidatures n’asturianu, lo que ye posible pola esistencia d’una sentencia del Tribunal Consitucional del 2000 a partir del recursu d’amparu constitucional presentáu pol partíu énte la decisión de la Xunta Eleutoral d’Asturies de proclamales pa les eleiciones al Congresu y Senáu y la sentencia del xulgáu de los contencioso-alministrativu númberu 2 d’Uviéu nel mesmu sentíu. Como ye vezu dende entós, solicitó la presencia nos colexos eleutorales de papeletes n’asturianu, atopando nesti casu’l refugu a tramitar l’escritu por tar en llingua asturiana.

En concretó dirixóse a les xuntes eleutorales d’Asturies, Xixón y Uviéu. “Deberá presentarlo, en su caso, en idioma oficial” y “presente la solicitud en el idioma oficial: castellano” foron les respuestes nos dos primeros casos, mentes que nel terceru esixeron una copia “en castellano”.

Un contrasentíu, yá que si’l papel tuviera escritu en cualesquier de les llingües oficiales del país, como podría ser en gallegu o en vascu, nun habría nengún problema pa ser aceptaos n’Asturies. Andecha asegura “que la represión llingüística n’Asturies esiste y dase tolos díes” y recuerda que ye posible votar cola papeleta n’asturianu, que deberán solicitar al partíu les persones interesaes al tar prohibida la so presencia nos colexos eleutorales.

Prueba nueva “de la necesidá de cuntar cola midida constitucional que ye la oficialidá”

Iniciativa pol Asturianu denuncia “esta llamentable y gravísima discriminación que se convierte amás nuna nueva prueba de la necesidá de cuntar cola midida constitucional que ye la oficialidá. La Xunta Eleutoral ye un muérganu estatal, por ello, la oficialidá sedría la única ferramienta qu’iguaría esti tipu de discriminaciones”.

“Atenta tamién contra la propia Llei d’Usu y Promoción del Asturianu que, nel so artículu 4, relativu al usu alministrativu, recueye claramente que ‘tolos ciudadanos tienen drechu a emplegar l’asturianu y a espresase n’él, de pallabra y per escrito’”, sigue’l coleutivu, qu’afirma que “nun se pueden almitir situaciones como ésta, na qu’una organización (seya la que seya) presente una documentación n’asturianu y el muérganu competente, la Xunta Eleutoral nesti casu, refugue siquiera considerala por únicamente tar escrita n’asturianu”. Poro, reclama “un posicionamientu claru y valiente del Gobiernu d’Asturies” énte esti casu.