Les Xornaes de normalización nos conceyos evidencien la situación asturiana

Les Xornaes de Normalización nos Conceyos entamaes pola Oficinade la Llingua de Xixón en collaboración cola Oficina de Política Llingüística entamaron asoleyando los paralelismos y diferiencies ente los procesos de normalización locales n'Asturies, onde entovía tan entamando los sirvicios locales y otros llugares onde yá se lleven munchos años desarrollando estes polítiques. La pequeña intervención d'apertura deRamón d'Andrés centróse nel reconocimientu al llabor de los conceyos enxertos na rede de normalización y tamién nel reconocimientu de que, fuera del llabor de la rede y de la oficina de la que ye titular, esiste un allancamientu de les polítiques normalizadores del asturianu.

D'otra manera, la mañana d'esti llunes dio pa conocer la esperiencia d'Almassora, un pequeñu conceyu valencianu con iniciatives y campañes que los responsables de normalización de los conceyos asturianos vieron como adaptables al nuestru contestu, anque la intervención más llarga de la mañana foi la de Socorro García Conde, responsable del "Departamento de Lingua Galega do Concello de Santiago".

Socorro espunxo les polítiques de normalización d'esti conceyu gallegu de 105.000 habitantes, nel que lleven yá más de quince años de campañes p'afalar l'usu del gallegu. La responsable compostelana esplicó que la dotación presupuestaria del so departamentu ye de 130.000 euros, una cantidá superior en 20.000 euros al presupuestu que mueve la Oficina de Xixón, ciudá con más del doble d'habitantes que la guapa ciudá gallega. Sicasí, más allá de la cuestión económica, la esposición de Socorro García punxo enriba la mesa como a lo llargo d'estos años hebo bien de procesos paralelos a los que se dan n'Asturies, como la desidia por parte de munchos políticos, que tardaron años n'aceptar la esistencia del departamentu y decatase de la so importancia y, per otra parte, la idea de bona parte del galleguismu de que'l departamentu aplicaba una política curtia de mires na defensa del idioma.