Les trés etapes de La Vuelta n'Asturies sumaron 7 millones d'espectadores

Les emisiones de RTVE al traviés de La 1 y Teledeporte de les trés etapes asturianes de La Vuelta algamaron la cifra de 7 millones d'espectadores, a lo qu'hai que sumar la repercusión que tuvo n'Eurosport. El final en Los Llagos, el más siguíu per televisión.

La Vuelta tuvo en tierres asturianes los díes 28, 29 y 31 d'agostu, xornaes nes que 1.400 profesionales de medios de comunicación acreditaos de 190 países siguieron la competición deportiva. La etapa más siguida foi la del llunes 29 d'agostu, ente Llugones y Llagos de Cuadonga, que rexistró 2.526.000 telespectadores. El percorríu ente Cistierna (Lleón) y Uviéu, el día 28, y el que trescurrió ente Colunga y Peña Cabarga (Cantabria), el 31 d'agostu, algamaron los 2.080.000 y 2.452.000 espectadores, de manera respeutiva.

Pa rentabilizar al máximu l'impautu mediáticu de La Vuelta, la Conseyería d'Emplegu, Industria y Turismu desenvolvió un plan d'espardimientu específicu nesos díes, tanto en medios de comunicación como en redes sociales. Coles mesmes, dispunxo d'un espaciu d'información turística en toles zones de salida d'etapa. Nesti puntu, atendió a más de 4.000 persones.

Les aiciones promocionales completáronse con una presentación d'Asturies como destín turísticu dirixida a los periodistes acreditaos nel marcu d'un eventu celebráu nel Muséu Fernando Alonso. Al potencial en términos d'imaxe p'Asturies como destín turísticu que representa La Vuelta, hai que sumar la repercusión económica que tien nel país. Según datos de la organización, esta prueba moviliza a más de 2.500 persones que, nesta ocasión, agospiáronse n'Asturies trés nueches.

La toponimia oficial nun se respeta

El puntu negativu del pasu de La Vuelta per Asturies foi, un añu, la falta de cumplimientu de la toponimia oficial, utilizando la castellana, yá derogada na mayoría de los conceyos del país. Esta situación nun se dio en Galicia, d'onde salió la ronda, nin n'Euskadi y la Comunitat Valenciana.

Otra manera, no deportivo, el ganador de la carrera ciclista foi'l colombianu Nairo Quintana (Movistar), con una ventaya de 1 minutu y 23 segundu col británicu Chris Froome (Sky) y de 4 minutos y 8 segundos col so paisanu Johan Esteban Chaves (Orica). Alberto Contador tuvo que conformase cola cuarta posición, mentes que l'asturianu Samuel Sánchez nun pudo finar la competición por mor d'una cayida na contrarreló del vienres.