Les trés corrientes mayoritaries d'IX consensúen una llista xunitaria

La Coordinadora nueva de la coalición salió alantre na asamblea d'Avilés con 368 votos a favor, 4 en contra y 6 astenciones.

El coordinador xeneral d'Izquierda Xunida, Ramón Argüelles, manifestó la so satisfaición por un resultáu que, al so xuiciu, reforzará a la formación pa ser una ferramienta útil na defensa de los derechos de la xente. "Ye una bocanada d'aire fresco pa plantegar el futuru que yá ta ehí pa muncha xente que nos necesita", apuntó.

María Teresa Lorenzo 'Telly' refugó la posibilidá d'incorporase al alcuerdu ente Argüelles y los otros dos candidatos que se presentaren al cargu de coordinador xeneral, Alejandro Suárez González y Fernando Díaz Rañón. Asina, la Coordinadora repartióse con 17 delegaos de la corriente del primeru, por 16 de la del segundu y 15 de la del terceru.

Posibilidá de que la izquierda pueda ganar les eleiciones

Esta cohesión mostrada pola coalición ye, n'opinión del alcalde de Ḷḷena, un requisitu imprescindible de cara a presentar un proyeutu seriu a la ciudadanía. "Equí hai una fuercia de verdá d'izquierda tresformadora", apuntó, pa depués amosar la so disposición en corvexer con Podemos y otres formaciones de la izquierda como EQUO, "pa qu'apaeza una fuercia que pueda disputar les eleiciones y ser la más votada" na próxima cita coles urnes.

Sobre'l modelu escoyíu, nun dio pistes de polo qu'apostará la próxima direición de la coalición, que tamién saldrá del consensu. "¿El de la marea puede ser? Pue ser. ¿El modelu Barcelona en Comú? Pue ser, pero va ser el que decidimos n'IX d'Asturies porque creemos que sí o sí hai qu'integrase nel conflictu social y queremos dir na mesma xunidá y na mesma cohesión que salimos d'equí".