Les trabayadores y ex emplegaes del Palaciu los Neños van celebrar otra concentración esti vienres

Coincidiendo col ‘Antroxu’ uviedín, les trabayadores y ex emplegaes del Palaciu los Neños d’Uviéu van celebrar una concentración nueva esti vienres a les 20 hores a les puertes del centru. Denuncien una situación de precariedá llaboral.
 
‘La precariedá nun s’amazcara’ ye’l lema de la concentración impulsada poles trabayadores y ex emplegaes del centru públicu xestionáu pola empresa privada XTRM –aición de protesta que cuenta col sofitu de la Corriente Sindical d’Izquierda (CSI)– tres les declaraciones feches pol direutor de la mesma, Jesús Isasa, a un mediu de comunicación asturianu tres la movilización última fecha polos afectaos. “Tengo 35 contratos pa la fin de selmana”, comentó Isasa, lo que supón “el triple de la plantiya habitual de XTRM nel centru”, según afirmen dende la CSI.
 
“Esta situación, na que predominen los contratos per díes, a pesar de que'l volume d'usuarios ta garantizáu pola Conseyería d'Educación y la Casa Conceyu, denuncióse énte la Inspección de Trabayu. Les trabayadores y ex trabayadores qu'impulsen la protesta tamién denunciaron otres irregularidaes rellacionaes coles cotizaciones a la Seguridá Social, too ello a pesar de que la empresa dirixida por Corsino Fernández niegue la esistencia de denuncies”, añaden. D’igual forma, el sindicatu recuerda que XTRM anunció “un plan de formación ambiciosu” tres l’entamu de les movilizaciones, lo que pa la Corriente dexa n’evidencia “que la empresa nun daba la formación necesaria a toles trabayadores del centru: primeros auxilios, prevención de riesgos llaborales, manipulación d'alimentos...”.
 
Pa terminar, la CSI esixe responsabilidaes a la SOF “por financiar una precariedá que la mesma empresa nin siquier amazcara”.