Les térmiques asturianes, ente les que vierten más azufre

La organización sueca "Secretariáu de la Lluvia Ácido" ta acabante d'asoleyar un estudiu actualizáu sobre les emisiones de dióxidu d'azufre (SO2) a l'atmósfera de los centros productores d'enerxía de toa Europa. L'informe incluye dos llistes, una curtia coles cien centrales más contaminantes de la Europa de los 25 y otra llista ampliada a 200 centrales incluyendo'l continente enteru.

Nel casu de la llista "curtia" correspondiente a los estaos de la UE ampliada, la central d'Hidroeléctrica en Soto Ribera ponse nel puestu 55 de la llista, mientres que la central de la mesma compañía n'Aboño - Xixón ponse nel puestu 68. Na llista ampliada al continente, y na que les centrales de Rusia ocupen un llugar de predominiu, Soto cai hasta'l puestu 101 y Aboño hasta'l 114, pero otres dos centrales asturianes entren al llistáu, la de Cangas del Narcea nel puestu 159 y la térmica d'Iberdrola en Lada-Llangréu nel 171.

Ello quier dicir que les centrales asturianes enxertes nel informe emiten ente toes elles más de 74.000 tonelaes de dióxidu d'azufre a l'atmósfera, pero ello ye que l'informe apurre datos qu'asitien el noroeste de la península ibérica como ún de los noyos de xeneración d'esta sustancia contaminante más grandes del continente. A la cabeza de la llista de les 100 centrales más contaminantes de la UE ta, con diferencia, la gallega d'As Pontes, que suelta ella sola 315.000 tonelaes d'azufre. La central de Meirama, tamién en Galicia, ocupa un puestu destacáu, el novenu de la llista, con 71.000 tonelaes, poco menos que les cuatro centrales asturianes xuntes. Galicia asítiase asina como otra potencia contaminante de primer orde Pero ye qu'amás pel sur, les centrales de Llión tan tamién en puestos altos na llista. La central de Compostilla ta nel puestu 14, La Robla ocupa'l puestu 16. Más p'atrás apaecen Guardo nel 64 y Anllares nel 66.

El SO2 ye ún de los causantes de la lluvia ácido y de los daños sobre les mases forestales. Les centrales térmiques que quemen carbón o fuel prodúcenlo en grandes cantidaes al entrar en combustión l'azufre que lleven el carbón y el fuel. Una cuenta mui per enriba diz que nuna central tradicional ensin sistema de desulfuración si'l carbón que se quema tien un 1% d'azufre la producción de SO2 vien a ser d'unes 5 tonelaes a la hora por cada 500 mw de potencia