Les telecomunicaciones nun son a crear emplegu n’Asturies

El tradicional estudiu que presenta tolos años la empresa Telecable sobre l'impactu de la lliberalización de les telecomunicaciones n'Asturies demuestra'l pocu puxu del sector, que cada añu invierte menos y que pierde puestos de trabayu a cuenta de les prexubilaciones en Telefónica.

Menos inversión y allancamientu na creación de puestos de trabayu, lo mesmo directos qu'indirectos. Estes son les dos conclusiones más negatives que s'entesaquen del estudiu sobre l'impactu de la lliberalización de les telecomunicaciones n'Asturies que ta acabante d'espublizar la empresa asturiana de Telecomunicaciones Telecable. Ente les conclusiones positives rescamplen delles que yá se conocíen, como'l fechu de que'l centru d'Asturies presenta unes tases de conexón a internet bien penriba de la media española o la baxa de los precios de la telefonía per aciu de la competencia ente les operadores.

La inversión en telecomunicaciones n'Asturies lleva baxando dende l'añu 2.001, y asítiase en valores que son la metada que los de va trés o cuatro años. Xunta la perda de dinamismu de la telefonía fixo y móvil, ello conozse que ye tamién responsabilidá de l'allancamientu n'articulación de la rede de cable pel país. Anque les empreses de telefonía fixo y móvil invierten muncho menos, l'esperáu espoxigue de la rede de cable que tendría de contrapesales sigue pel momentu ensin dase, y les cuenques mineres y Siero, siguientes oxetivos de la rede de cable entovía nun tienen fecha nin financiación.

Si la inversión nun medra, l'emplegu recula per aciu del efectu d'una "reconversión silenciosa" que ta dándose dende los años 90 en Telefónica. La gran empresa de telecomunicaciones ta faciendo una política de prexubilaciones que ye la principal responsable de la baxada del emplegu directu nel sector. Nel añu 1997 trabayaben nes telecomunicaciones n'Asturies 1.452 persones, mientres que nel 2003 esa cantidá baxó hasta les 982 persones. Naquel añu 97, les empreses del subsector del cable namás daben trabayu a 27 persones y les de telefonía móvila a 50, mientres que Telefónica tenía una plantiya de cerca de 1.400 trabayadores n'Asturies. Siete años dempués, el cable y la telefonía móvil remanen caún 125 y 110 emplegos directos, mientres que'l sector de la telefonía fixo ocupa namás a 748 persones, la metada menos que va seis años.

L'emplegu indirectu nel sector de les telecomunicaciones asturianes tien otru comportamientu bien distintu. Mientres la telefonía fixo tien alredor d'ella un númberu estable de trabayadores indirectos qu'anda ente les 120 y les 140 persones, la telefonía móvil vien creando una masa llaboral alredor d'ella que crez en proporción xeométrica de va cuatro años p'acá. Asina, si nel 2000 los operadores de móvil crearon 354 puestos de trabayu indirectos, nel 2003 esta cifra allegóse a los 1.000. pela so parte, la operadora de cable ye tamién mui estable na creación de trabayu indirectu, abeyando alredor d'ella unos 500 puestos.

Un datu curiosu que s'atopa ente les conclusiones del estudiu ye'l ver como nel exerciciu 2003 la telefonía móvil adelantó a la telefonía fixo en facturación per primer vegada na historia. Esta estaya de negociu facturó per importe de 229 millones d'euros n'Asturies nel2003 contra los 220 de la telefonía fixo, mientres que les cuentes de la cablera presentaron 49,2 millones de facturación. Les operadores de televisión de pagu, pela so parte (nun inclúi a Telecable) facturaron n'Asturies 28 millones d'euros.