Les radios llibres convoquen una concentración pa reclamar el so derechu a emitir pel FM

Esti vienres va celebrase una concentración n’Uviéu pa reclamar el derechu de les radios comunitaries a emitir pel FM. Esta movilización llega polos problemes que ta poniendo Telecomunicaciones a Radio Sele, Radio QK y Radio Kras.
 
Según recuerda la Coordinadora de Radios Llibres d’Asturies, coleutivu qu’entama la concentración, el 1 de mayu pasáu aprobábase la Llei Xeneral de la Comunicación Audiovisual, incorporando a la llexislación la figura de los servicios de comunicación comunitarios ensin ánimu d’arriquecimientu. Esta llei fixaba un plazu máximu de 12 meses pa entamar el procedimientu de concesión de la llicencia y la concreción del marcu d'actuación d’estos servicios de comunicación, plazu yá fináu, lo que, pa la organización “nun torga'l reconocer les emisores”. Por esti motivu, reclamen a la Direición Xeneral de Teunoloxía de la Información y les Comunicaciones “que nos reconozan como Serviciu de Comunicación Comunitariu y que soliciten a l'Alministración Xeneral del Estáu'l dominiu públicu necesariu pa ufrir esti serviciu”.
 
La concentración, que va principiar al meudía, va tener llugar frente al Rexistru Xeneral del Edificiu d’Usos Múltiples, na cai Coronel Aranda d’Uviéu. Esta aición de protesta llega tres les trabes que ta poniendo la Jefatura Provincial de Telecomunicaciones a trés de les radios que conformen la Coordinadora, con amenaces de multa de 500.000 euros a les comunidaes de vecinos onde tienen asitiaes les antenes, al considerales illegales. Radio Sele, la única emisora n’asturianu dafechu, ye una de les perxudicaes y ta viéndose obligada ufrir la so programación namái per Internet.