Les radios comunitaries van aconceyar el sábadu pa tratar el pieslle de Radio Sele

Representantes de Radio Kras, Radio QK.racha y Radio Nava, amás de los responsables de Radio Sele, van aconceyar el sábadu pa tratar el pieslle de la emisora n’asturianu. Van trabayar p’amosar que “Radio Sele ye alegal, non illegal”.
 
La reunión ta prevista pa les 18.30 hores nes instalaciones de la xixonesa Radio Kras y nella van falar sobre la situación actual qu’afeuta a Radio Sele “pero que podía tocanos a cualquiera de les otres radios comunitaries d’Asturies”, señala Falo Marcos, ún de los responsables de Radio Kras. Ayeri, a les 10 hores, la única cadena del dial qu’emite dafechu n’asturianu tuvo que zarrar la so emisión pel FM por decisión del xefe nuevu de Telecomunicaciones nel país, José Antonio Díez Menéndez, al considerala illegal.
 
Nesi sen, David Fernández, miembru de l’asamblea de la uviedina Radio QK.racha recuerda “que les radios comunitaries son alegales, pero non illegales”, polo qu’anuncia que la emisora de la que forma parte “va trabayar tolo posible xunto con Radio Sele pa demostrar que nun ye illegal”. L’ausencia d’una llei que regule la esistencia d’estes radios pese a l’aprobación nel Congresu en marzu del añu pasáu d’una moción qu’encamienta a les comunidaes autónomes a revisar les emisiones radiofóniques n’involuntaria irregularidá, lleva a qu’estes emisores “teamos al amparu de les decisiones del funcionariu de turnu”, señala Fernández.
 
Por ello, Diego Rodríguez, responsable de Radio Nava, reclama “un especiu llegal dientro del espectru radiófoniu pa nun depender de les decisiones de los políticos que tean gobernando nesi momentu”, pa lo que propón, como otros coleutivos a nivel estatal, que se dedique del 107 de la FM p’arriba a les radios comunitaries. D’igual forma, Rodríguez llamenta’l pieslle d’una radio que realiza una función social “cuando nestos momentos hai emisores pirates que tán faciendo negociu”. Mentes, pa Marcos “ye inaceptable qu’a estes altures un señor, de sópitu, se dedique a intervenir d’una manera tán drástica” y recuerda que “Radio Sele lleva más de 25 años d’emisión”.
 
Llabor de promoción del asturianu
 
Los miembros de les trés radios destaquen el llabor social que carauteriza a les radios comunitaries y el papel perimportante que tuvo y tien Radio Sele pa promocionar y normalizar la llingua asturiana. Asina, Fernández recuerda qu’esta emisora “nació del esfuezu d’un coleutivu que nun cobra y que, nunos tiempos distintos, onde l’asturianu nun tenía’l mesmu reconocimientu qu’agora, apostó por emitir nesta llingua. Güei, l’asturianu nun tendría la repercusión que tien si nun fora por Radio Sele y otros coleutivos similares”.
 
Otra manera, Radio Sele continúa coles sos emisiones con normalidá per Internet y na so web continúen anunciando la emisión del partíu ente l’Uviéu y el Conquense del domingu, a les 17 hores, y el desplazamientu próximu a Udin con motivu del Liet International. Pa esti vienres, l’equipu que conforma la familia de Radio Sele va aconceyase a les 19 hores nun llugar por definir n’Uviéu pa falar de la situación nueva tres el pieslle de la emisón pel FM.