Les persones indignaes concentraes nes places asturianes celebren delles actividaes esti vienres

Pese a la decisión de la Xunta Eleutoral Central de prohibir na xornada de reflexón toles concentraciones que tán celebrándose en tol Estáu, éstes continúen con normalidá. Les d’Uviéu y Xixón anunciaron delles actividaes pal vienres.
 
Los concentraos na Plaza Mayor de Xixón celebren esta tarde, a les 16.30 hores, una actividá de software llibre, mentes que pa les 19 hores ta convocada una concentración –con permisu de la Delegación de Gobiernu estatal dende primeros de selmana, según confirmen dende ‘Democracia real yá Asturies’– frente al Teatru Xovellanos pa depués acudir tolos presentes hasta la Plaza Mayor pa principiar una asamblea nueva cola xente que se queda nel llugar manteniendo l’acampada. Pa les 21 hores ta previsto facer ruíu con potes, dalgo que se vien faciendo a la mesma hora en tol Estáu, y a les 23 hores, el restorán la Perdiz Roja va ufrir a les persones que tean na Plaza Mayor una cena solidaria con arroz con pollo a la que tol mundu pue trayer dalgo más de comida.
 
Mentes, na plaza Escandalera d’Uviéu l’actividá va principiar pela mañana, a les 12.30 hores, con una aición simbólica contra los bancos y la crisis. A les 18 hores va celebrase una charra col títulu ‘Causes y consecuencies de la crisis n’Asturies’, tres la que la hermana del cámara gallegu asesináu poles fuercies estauxunidense en Bagdad, José Couso, va ufrir unes pallabres a los presentes, y pa les 20 hores ta prevista l’asamblea diaria de los indignaos.
 
N’Avilés tovíen nun tien zarraes les actividaes del día, qu’anunciaránse peles redes sociales esta mañana. Mentes, otres poblaciones asturianes tán sumándose a les protestes. Ye’l casu de La Pola Siero, onde ta programada una concentración esti sábadu na plaza de la Casa Conceyu a les 19 hores. En Mieres y Llangréu tamién hubo concentraciones ayeri.
 
Pa esta nueche s’espera que’l númberu de persones que pasen la nueche n’abertal en mou de protesta aumente de forma considerable en toles ciudaes asturianes. Munchos trabayadores que, poles sos responsabilidaes nun pudieron acudir estos díes a les acampaes, acudirán esta fin de selmana aprovechando les xornaes de descansu. Hai que destacar que'l númberu de persones que participen nes concentraciones y que queden a dormir ye mayor xornada a xornada.