Les patronales asturiana y arxelina faen un alcuerdu empresarial

|

Los presidentes de les patronales asturiana y arxelina, Severino García Vigón y Boualem M'Rakeche, soscribieron esti llunes n'Arxel un acuerdu de "collaboración xenérica" pa la puesta en marcha de "negocios comunes".

El conveniu firmóse nel marcu d'un foru d'oportunidaes de negociu nel que participa una delegación asturiana conformada por un total de 38 empresarios, que viaxó esti domingu al país encabezada pol presidente del Principáu, Vicente Álvarez Areces, y otres autoridaes empresariales y institucionales.
  
Acompañáu pol conseyeru d'Industria, Graciano Torre, Vigón valoró que se trata d'un "instrumentu escelente" pa que les empreses tengan un puntu d'apoyu en futuros acuerdos de trabayu. Concretó, sicasí, que se trata d'un pactu "al usu" que tendrá que concretase cola execución y realización de negocios comunes.
  
"Queremos meyorar y intensificar les relaciones comerciales que se dan ente la nuesa rexón y esti país. Los empresarios tán equí porque Asturies quedóse-yos pequeña y perdiéron-y el mieu a los mercaos esteriores. Queremos formar parte de la modernización d'Arxel, como socios y como amigos", manifestó.
  
El so homólogu arxelín opinó que se trata de "un buen entamu" pa la execución d'oxetivos comunes y una forma de manifestar el compromisu d'ambos actores d'afondar nes relaciones billaterales. "Somos empreses y vamos alcontrar dificultaes, pero ta previsto desarrollar una cooperación ente los socios firmantes del acuerdu y informamos de les perspectives técniques y económiques", apuntó.

Regulación pa pymes

Pela so parte, tanto'l presidente del Principáu, como l'embaxador d'España n'Arxelia, Gabriel Busquets, reclamaron que se constituya un marcu regulatoriu que facilite la presencia de les pequeñes y medianes empreses españoles y asturianes nel país, por tratase de "les más representatives y competitives" nel terrenu internacional, según Álvarez Areces.
  
El presidente refirióse a los sectores del aluminiu, del heliu y el nitróxenu, el papel, el vidriu y los fertilizantes como aquéllos que presenten les mayores oportunidaes de negociu del Magreb y destacó la "sólida esperiencia" de les empreses asturianes n'enerxíes como la fotovoltaica y ámbitos como'l de la inxeniería civil y el tresporte.
  
Mientres la so intervención, refirióse al Principáu como "ún de los principales centros siderúrxicos y metalúrxicos d'España" y aseguró que la combinación de les infraestructures viarias y marítimes en marcha van convertir a Asturies "nun centru neurálxicu nel arcu atlánticu".
  
Nel apartáu de los retos, reconoció que la comunidá presenta nesti momentu un tráficu comercial "manifiestamente meyorable", polo que les posibilidaes de cooperación ente les empreses d'una y otra parte son "enormes".
  
L'embaxador estimó l'apuesta de les alministraciones española y asturiana por aumentar llazos con Arxelia, nun momentu, dixo, nel que les empreses españoles "precisen reforzar les sos esportaciones". Recordó qu'Arxelia presenta, al respecto d'España, el so cuartu mayor superávit, y saludó los intercambios qu'ayuden a equilibrar esa balanza.
  
Al so xuiciu, factores como la vecindá xeográfica, una interdependencia comercial creciente y la voluntá compartida de facer del Mediterraneu un espaciu de paz y progresu constitúin "una base escelente pa cualquier cooperación".
  
A lo último, el secretariu xeneral del Ministeriu d'Industria arxelín, Driss Tandjaoui, indicó que les relaciones ente ambos territorios conocen dende hai años un "desarrollu notable", cola participación d'empreses asturianes en proyectos de desalinización y enerxíes renovables. En representación del ministru, col que sí se reunieron les autoridaes asturianes, recordó que la estructura pública arxelina "precisa ayuda" pa enfrentase a les necesidaes de la población del país.
 

Contador Estadistiques