Les parroquies de Xixón tomaron la ciudá

La protesta del Xixón Rural contra'l nuevu Plan Xeneral d'Ordenación Urbana que l'Ayuntamientu cuenta con dar de pasu mañana llunes perpasó, con muncho, lo qu'esperaben los organizadores, y foi la manifestación con más xente dende les que se ficieron va agora un añu contra la invasión d'Iraq. Más de 7.000 persones que venien marchando dende cuatro puntos distintos tomaron el centru de Xixón nuna manifestación abierta por siete tractores que terminó na Plaza Mayor, onde se lleo'l manifiestu, de que se fizo entrega de copia los trés grupos con representación política na casa conceyu. El PXOU de Xixón, que preve rbanizaciones y espropiaciones en delles parroquies, tien el preste del PSOE y de IX-BPA, mientres que'l Partíu Popular aprovechó la ocasión pa marcase un tantu políticu vistiendo les camisetes verdes que llevaben los manifestantes. Representantes d'Izquierda Xunida dixeron que "diben estudiase" los puntos del manifiestu, mientres que'l PSOE remembró que por grande que fuere la manifestación "el PSOE tuvo más votantes el 25 de mayu que xente protestando" pa xustificar que nun diben facer casu de la manifestación.

El conceyal d'Urbanismu, Jesús Morales,pal que se-y pidió que dimitiere, y la empresa de xestión del suelu del Principáu, Sogepsa, yeren los oxetivos principales d'unes pancartes nes que la pallabra "espoliu" yera la que más se repetía, como espeyu de la sensación d'engañu que viven munchos de los afectaos.