Les otres elecciones

El recuentupa otres comunidaes autónomes que tamién celebraben esti domingu elecciones autonómiques apurre dellos resultaos que ruempen colo que s'esperaba. Vamos da-yos un repasu a dellos parlamentos autonómicos y municipales

En Cataluña, que namás celebraba municipales, la gran noticia ye la xuba espectacular d'Esquerra Republicana de Catalunya. La formación nacionalista d'izquierdes dobla representación pasando de 677 a 1.253 conceyales, y conviértese na tercer fuerza política catalana por votos y por representación.
Ver resultaos en Cataluña


N'Aragón, el PP suspende'l referendum pol tresvase del Ebro y déxa-y el trunfu al PSOE, mientres que la Chunta Aragonesista conviértese en tercer fuerza política con 9 escaños y el PAR baxa un poco pa pasar de 10 a 8 diputaos. Cualquiera de los dos partíos aragonesistes va tar en condiciones de pactar cola mayoría relativa del PSOE, mientres qu'IU aguanta na corte aragonesa con ún solu representante. Ver resultaos n'Aragón

Los vecinos cántabros tienen tamién una alternativa de la tierra pa pactar cola fuerza mayoritaria estatal la formación de gobiernu. El PP baxó un escañu en Cantabria y el PSOE otru, xusto los que gana'l PRC, una formación rexonalista con ideoloxía de centru derecha que pactará cásique seguro gobiernu col PP. Ver resultaos en Cantabria

Llamen l'atención los resultaos de Galicia, onde tamién se celebraben solo les municipales. Anque'l galipote del Prestige entafarra tola costa, ello parez que nun tuvo consecuencies polítiques. El panorama políticu gallegu sigue estable, con namás una pequeña baxada del PP y una pequeña xuba de BNG y especialmente del PSG-PSOE. Ver resultaos en Galicia

El mapa políticu vascu ye muncho más revesosu nestes municipales. N'Euskadi, la illegalización d'HB dio-yos mas votos a otres opciones nacionalistes, casu d'EA y sobremanera'l PNV, amás d'IU, pero'l fechu de qu'apaecieren más de 127.000 votos nulos y otros 17.000 en blanco (más del 10%) demuestra que l'electoráu d'HB sigue ehí y nun tiró per otres opciones. Ver resultaos n'Euskadi

Pela so parte, el mapa políticu navarru píntase con dellos colores. Al marxe del trunfu de la UPN, que xube respective al 99, la noticia dientro d'esti parlamentu en que va haber hasta seyes partíos distintos con representación ta na entrada con cuatro escaños d'Aralar, la formación nacionalista esgayada de Batasuna qu'arreniega de la violencia como ferramienta política. Ver resultaos en Navarra