“Les otres cares del planeta” entren na so recta final

Los alcuentros "Les otres cares del planeta" que se celebren tolos años en Xixón entren nos sos últimos díes. Güei xueves, el profesor Enrique J. Díaz, de la Universidá de Lleón, presenta una investigación sobre la influyencia de los videoxuegos na sociedá y los valores que tresmiten, mientres que la xornada de mañana vienres queda acutada pal debate sobre l'estáu laicu y l'espaciu de les relixones na sociedá d'anguaño. Pa ello va contase cola participación del caderalgu de derechu canónicu de la Universidá Complutense Dionisio Llamazares, el sacerdote y caderalgu d'historia medieval Javier Fernández Conde y Mustafá Mrabet, representante de los inmigrantes marroquinos n'Asturies. La xornada final, el sábadu, va ser bien intensa, contando pela mañana con un taller de radio alternativa al cargu de la veterana emisora independiente Radio Kras y otru sobre resolución de conflictos cola participación de Cristina Merino, formadora social y abogada y miembru del Centru Universitariu de Tresformación de Conflictos. P'acabar, la tarde del sábadu va centrase nun debate intensu que, baxo'l títulu "¿inmigración / conflictu?" va sentar a representantes de les comunidaes arxentina, guineana y marroquina n'Asturies.

Xunto los debates y meses redondes, "les otres cares del planeta" acuten sitiu pa la diversión, incluyendo cada nueche del certame los "percorríos nocherniegos". Música de tolos estilos, proyecciones de diapositives, teatru y, pal sábadu, una cena popular en collaboración cola asociación de vecinos de Cimavilla cola que van pesllar estos alcuentros.