Les noveles de lliteratura fantástica ‘L’home les caparines’ y ‘Del llau del nigromante’ escosen la primer edición

Ediciones Radagast escosó en pocos meses la primer edición de dos de les sos noveles y ta acabante d’asoleyar la segunda de dambos títulos. Son ‘L’home les caparines’, de Blanca Fernández, y ‘Del llau del nigromante’, de Nicolás Bardio, autores que participen esti martes nel festival avilesín de terror, fantasía y ciencia ficción Celsius 232.

Pertenecientes a un xéneru pocu trabayáu na lliteratura asturiana, como ye la lliteratura fantástica, el recibimientu de los llectores a dambos títulos foi esceicional. ‘L’home les caparines’ vendió tola primer edición en namái dos meses, mentes que ‘Del llau del nigromante’ fíxolo en mediu añu, entrambes con una tirada de 200 exemplares.

Asoleyaes por iniciativa privada dafechu, dende Radagast rescamplen el fechu de qu’estes dos noveles valten el mitu “de que la lliteratura asturiana ta ‘sovencionada’”. Nun ye ayenu a la repercusión que ta teniendo nes nueses lletres esta escena’l Celsius 232, qu’entama esta tarde un espaciu dedicáu a la mesma na so décima edición.

Va ser a les 18.55 hores na carpa d’actividaes asitiada na redolada de la Casa Cultura baxo’l títulu ‘¿Lleguen aires nuevos a les lletres asturianes?’. Nella van participar Fernández y Bardio xunto con Montse Machicado, responsable de la Estaya de la Llingua d’Avilés, con Inaciu Galán como moderador.