Les novedaes editoriales de Radagast y la traducción al asturianu protagonicen la primer xornada del Celsiu 232

El certame avilesín de terror, fantasía y ciencia ficción va allargase hasta'l sábadu.

Cuatro títulos de Radagast protagonicen la primer xornada del Celsius 232. A lo llargo de la tarde van socedese presentaciones de llibros editaos esti añu, siendo'l primeru en participar a les 17.50 hores na carpa instalada na plaza Domingo Álvarez Acebal, Andrés Fernández col so '1809: Cartes de la Revolución de Trubia'.

Darréu va tomar la pallabra Blanca Fernández pa falar de la so segunda novela, 'Trovadoresca', pa siguir, a les 18.50 hores, Adrián Carbayales cola torna al castellanu de 'La Rexenta contra Drácula'. Completa la representación de Radagast, Dam Fernández, autor de 'El roble azul'.

Blanca Fernández, Carbayales, Aymara González y l'editor Nicolás Bardio van participar depués, a les 19.50 hores, nel alderique 'Traduciendo al asturiano a los maestros del género fantástico'. Bardio va tornar el sábadu al Celsius 232 pa organizar una partida del xuegu de rol '1984: Thoughtcrime', basáu na novela '1984' de George Orwell, "onde los xugadores habrán encarnar a miembros del Partíu Únicu d’Oceania nuna opresiva dictadura distópica".

Radagast pretende asoleyar esti títulu nuevu n'asturianu, castellanu, inglés y catalán, pa lo que va entamar una campaña de micromecenalgu na rede.

Más de 150 autores

El Celsius 232 celébrase estos díes n'Avilés cola participación de 200 autores de los xéneros sobre los que xira'l festival y actividaes en dellos puntos de la villa. La plaza Domingo Álvarez Acebal acueye les casetes onde los aficionaos van poder mercar llibros, cómics y productos venceyaos.