Les muyeres compositores protagonicen la obra última de Trexu

|
Cubierta 'Piedra gris con rellumos doraos' d'Helena Trexu

‘Piedra gris con rellumos doraos’ ye’l títulu de la obra nueva d’Helena Trexu Fombella, que se va presentar esti vienres en Xixón nun actu que va contar cola presencia de la cantante Silvia Quesada. Y ye que la música ye la temática sobre’l que xira esti llibru pa la reciella nel que son protagonistes les muyeres compositores.

Una neña, Dobra, intérprete d’un instrumentu y fía tamién d’una música, ye la que cuenta esta historia que busca “visibilizar y homenaxar la música compuesta por muyeres, cuasi siempre amatagada y a vegaes incluso apropiada polos homes, y alendar a les nueves xeneraciones de neñes y moces a que lluchen polo que-yos presta y nun se dexen influir por estereotipos”. El Grupu Epona edita esta obra que surdió nel pasáu confinamientu.

La xixonesa Escuela de Comerciu va acoyer mañana la presentación de ‘Piedra gris con rellumos doraos’ a les 19.30 hores, con aforu llendáu pa cumplir coles midíes de seguranza pola COVID-19, polo que p’asistir ye necesario acutar plaza nel corréu electrónicu grupu_epona@yahoo.es aportando nome y númberu de teléfonu. Trexu y Quesada van participar nel actu, onde va ser posible adquirir el llibru, que yá se pue atopar nes llibreríes.

Contador Estadistiques