Les Mocedaes Socialistes enxerten l’asturianu nel XXIX congresu de la FSA

El testu aprebáu na Comisión d'Entramáu Institucional fala del asturianu como "activu que merez protección y promoción" y encamienta al partíu a xenerar un "consensu políticu y social" sobre la diversidá llingüística d'Asturies"

Les Mocedaes Socialistes consiguieron que l'asturianu figure nes conclusiones del congresu de la FSA. Los comisionaos de les MSA na mesa d'entramáu institucional, segunda de les cuatro comisiones de trabayu en que se divide esti XXIX congresu de los socialistes asturianos, consiguieron dempués d'una llarga mañana de negociaciones, enxertar una referencia a la llingua asturiana y les posibilidaes de desarrollu del autogobiernu ente les conclusiones de la mesa. Los militantes de les Mocedaes Socialistes falen de que, anque alcontraron resistencia en partíu, el testu que s'aprebó da un "marxe de trabayu pal futuru", y el mesmu presidente de la Comisión congresual faló de qu'esti testu "mete a la FSA en debate sobre'l tema".

Mocedaes Socialistes llegaben a esti congresu con una moción, aprebada pola mesma Xuventú Socialista y poles agrupaciones de Xixón, Uviéu, Siero y Llaviana na que se falaba esplícitamente d'oficialidá, anque ellos mesmos contaben con que nun diba permitise qu'esi testu orixinal se diere de pasu en congresu. Énte esta situación, les MSA entamaron una riestra de reuniones y entrevistes col envís de negociar un testu que, en cierta midida, comprometiere al partíu mayoritariu n'Asturies a la defensa del asturianu, una cuestión que quedare aparcada nel anterior congresu.

El testu definitivu, que s'aprebó ensin votos en contra pola Comisión d'Entramáu Institucional y que, polo tanto, nun va precisar de ratificación en plenariu del congresu, diz asina:

"Sobre'l aspectu orgánicu y institucional, la posible reforma del estatutu ha facese dende l'analís previu del grau de perfeccionamientu de la estructura política que da cuerpu al autogobiernu de la nuestra comunidá, particularmente tres de los efectos de la reforma del 99, ello ensin perxuiciu de dibuxar otros caminos pal so desarrollu futuru, acordies col crecimientu de la capacidá competencial de la nuestra comunidá pa desplegar la so actividá en mayores ámbetos competenciales."

"Respective a ello, el crecimientu del nivel d'autogobiernu qu'Asturies esperimentó estos años últimos permite abrir el debate sobre la posible asunción de nueves competencies,al empar que s'asienta y perfecciona l'actual bagaxecompetencial col que cuenta la nuestra comunidá."

"En cuantes al ámbitu relativu a los valores y rasgos propios d'Asturies, cabe sorrayar la diversidá llingüística como patrimoniu cultural de la nuestra comunidá. La llingua asturiana-bable y la fala o gallego-asturianu (nel ámbitu del Navia-Eo) son activos que merecen protección y promoción dende l'alministración autonómica y municipal, y contribuyendo a la xeneración d'un consensu políticu y social sobre l'estatus propiu de la diversidá llingüística d'Asturies".

D'otra manera, el llabor del XXIX congresu de los socialistes asturianos desarróllase ensin nengún problema nin contratiempu. Los delegaos sofitaron, con un 98% de votos a favor, la xestión de Javier Fernández, qu'esta tarde va salir escoyíu pa un segundu mandatu al frente de la FSA. La griesca que pudiere armase va ser mañana, cuando va decidise la composición de la nueva executiva.