Les meyores viñetes d’Efrén d’Andrés pasen a papel en ‘Dame la risa’

Yá ta nes llibreríes ‘Dame la risa’, una escoyeta fecha por Efrén d’Andrés de les sos viñetes espublizaes n’Asturies.com dende’l 2012. Inclúi les series sobre la sidra o la COVID-19 y otres inédites.

‘Asturies.com incorpora les viñetes humorístiques d’Efrén d’Andrés’ entitulábamos el 23 de marzu del 2012. Dende entós esti xenial dibuxante vien collaborando con esti mediu dixital de forma continua, sacando a los nuesos llectores una sonrisa con caún de los sos trabayos.

12 años que l’autor y Araz –empresa editora d’Asturies.com–, en collaboración con La Fabriquina, treslladen a un llibru. Ye ‘Dame la risa’, una escoyeta d’Efrén de les sos meyores viñetes y series na que tamién hai espaciu pa histories inédites, como ‘Una gueta con sorpresa’, ‘Un gaiteru frustráu’ o ‘El tesoru’.

Siete bloques

La obra divídidese en siete bloques, caún con un testu introductoriu. El primeru, 'Selección de viñetes', el más estensu, recueye les principales viñetes selmanales qu’Efrén vien asoleyando nesti mediu, cuasi 200 viñetes de temática variada ordenaes cronolóxicamente según foron saliendo a la lluz.

Sigue la serie ‘Coronavirus’, espublizada nel confinamientu pola pandemia de COVID-19 y formada por 16 viñetes con un testu versu, y ‘La nueva normalidá’, que na mesma llinia contaba con humor les circunstancies de la desescalada. El cuartu bloque ye ‘La sidra al traviés del tiempu’, otres 16 viñetes que buscaben de poner de manifiestu los cambios producíos nel consumu d’esta bébora.

‘Propuestes de restauración y nuevos usos del horru’, serie de 6 viñetes con propuestes estravagantes sobre usos nuevos del horru, incorpora nesta edición una sétima inédita. Nun podía faltar nesta recopilación ‘Los cuentos del mio pá’, onde Efrén inclúi dos rellatos de Mánfer de la Llera, reconocíu autor de la lliteratura asturiana: ‘Nueche abegosa’ y ‘Una gueta con sorpresa’, ésti últimu otra novedá qu’ufre ‘Dame la risa’.

Pa finar el llibru con una sonrisa, y baxo’l nome de ‘Monólogos ilustraos’, l’autor regálanos dos histories nueves, ‘Un gaiteru frustráu’ y ‘El tesoro’. La meyor manera d’acabar una obra, yá a la venta, que va dar muncho que rir.