Les mazcaraes d'iviernu nun salen pola situación sanitaria pola COVID-19

Los Aguilandeiros de San Xuan de Villapañada suspenden la celebración del domingu.

Per segundu añu los personaxes de les diferentes mazcaraes d'iviernu del país nun van salir a pidir l'aguilandu dada la situación sanitaria pola pandemia de COVID-19. L'alta tresmisión de la variante ómicron invita a ser previsores y a esperar a tiempos meyores pa estes celebraciones.

"Na parroquia San Xuan hai muncha xente mayor, que nos abre las puertas de casa, pa danos de lo buenu, lo meyor que tienen. Esa xente ye la que nos fai mazcaranos ya pasallu bien. Tenemos que cuiriala del bichu, ya vendran bonos tiempos pa tocar las lluocas", esplicaba la mazcarada del llugar, recuperada nel 2014. Ésta ye la primera en salir nesti tiempu y contaba percorrer na mañana del domingu los pueblos de San Xuan, Rozadas, Acebeu y La Llinar.

Os Reises del Valledor, el Guirria en Ponga y Os Reises de Tormaleo seríen los siguientes en salir estes dos selmanes de Nadal, pero estes comparses tamién van tar afeutaes pola situación sanitaria.