Les grandes radios denuncien l'actividá de les emisores illegales

El Viceconseyeru de Presupuestos y Alministración Pública, Luis Iturrioz, aconceyó col Secretariu Xeneral de l'Asociación Española de Radiodifusión Comercial, Alfonso Ruiz de Assin. L'alcuentru, al que tamién asistieron los directores de las principales cadenes qu'emiten n'Asturies, tenía por oxetivu tresmitir al Gobiernu asturianu les conclusiones de la última samblea xeneral de l'AERC, que decidió entamala coles emisores illegales n'España. Pa ello, los representantes de l'AERC apurriéron-y al Viceconseyeru'l llistáu de les emisores en situación d'irregularidá que trabayen n'Asturies. La "llista prieta" de diales inclúi 40 emisores ensin concesión alministrativa, una con concesión pero con irregularidaes y 5 emisores de conceyos con "irregularidaes detectaes". El Viceconseyeru comprometióse a contrastar los datos que se-y presentaron y a tramitar les denuncies correspondientes.

Según los datos de l'asociación, nel estáu esisten 2.400 emisores illegales, detectándose n'Asturies una situación "menos grave" que la media.

El panorama de les radios que trabayen ensin llicencia alministrativa incluye a emisores que, por programación y oxetivos comerciales compiten directamente coles emisores llegales y tamién a les llamaes "emisores alternatives". Les más d'elles operen con frecuencies de mui pocu alcance y nun rexistren beneficios económicos. Si les primeres tienen peor defensa, les segundes tuvieron pendientes a lo llargo de los años 90 de conseguir un réxime de llegalidá, pero'l procesu quedó aparcáu en 1997. El procesu pue volver a abrise pa estes radios, según s'esplicó nuna rempuesta del Gobiernu al diputáu José Antonio Labordeta'l mes de payares na que l'executivu especificó que les radios asociatives y comunitaries son "radios de proximidá al ciudadanu" anque esclariando qu'han de tener cobertures de baxa potencia.