Les Families Pola Escolarización quieren que se garantice’l derechu a estudiar llingua

Arturu Bermeyu, representante de l'Asociación de Families Pola Escolarización n'Asturianu, aconceyó esta mañana col Conseyeru de Xusticia Javier Valledor.

L'Asociación de Families Pola Escolarización del Asturianu forzare la otra selmana, al traviés d'un encierru na mesma sé de la Conseyería de Xusticia una entrevista col Conseyeru Javier Valledor trés de delles solicitúes formales.Arturu Bermeyu, representante de l'Asociación, esplicó a Asturies.com los términos de la entrevista, que se desarrolló esta mañana y apuntó les principales reivindicaciones del colectivu de families.

Arturu Bermeyu esplicó que tres de venti años d'escolarización del asturianu, "namás vemos que pasos p'atrás nel procesu de normalización del asturianu nel sistema educativu. La situación a la que se llegó esti añu, en qu'hasta los alumnos de secundaria ficieron una fuelga porque son conscientes de que se-yos torga'l derechu a recibir clas d'asturianu abúltanos d'una gravedá estrema" apuntó Bermeyu, qu'esplicó que l'Asociación plantegó-y a Valledor nesta primer toma de contactu la necesidá de "garantizar l'exerciciu del derechu a cursar asignatura d'asturianu".

Pa ello l'Asociación diz qu'hai qu'acabar col "cupu de los ocho" mínimu d'alumnos qu'esixe Educación pa facer grupu d'asturianu en cada centru. Xunta esto, les families pola escolarización entienden que ye preciso que los centros dispongan de personal, polo que quieren que cada centru escolar tenga un mínimu d'un profesor d'asturianu asignáu, de manera que se garantice la presencia del asturianu "en tol ciclu formativu". Bermeyu foi mui críticu nesti puntu colos sindicatos d'enseñanza UXT y CCOO por "firmar un manifiestu como'l del Conceyu Abiertu pola Oficialidá y dempués roblar alcuerdos como esti del cupu de los ocho alumnos que van a la contra de lo que diz el CAO". Bermeyu fizo estensiva la crítica al mesmu Javier Valledor en cuantes que miembru d'Izquierda Xunida, organización firmante del CAO "que consiente con tolo que ta pasando"

D'otra manera, xunta estos oxetivos mínimos, necesarios pa que se cumpla cola llei, Arturu Bermeyu esplicó que la situación del asturianu na enseñanza ta estrada de paradoxes y contradicciones, y asina quexóse de que "cuando se ta xeneralizando la política de facer centros billingües qu'escolaricen en castellanu y inglés o francés, entovía nun esista dempués de venti años de la entrada del asturianu nel sistema educativu nengún centru billingüe n'asturianu nin tampoco se plantegue la posibilidá de crealu". Ello lleva a Bermeyu a entrugase "¿ónde ta la política de promoción del asturianu?"

En cuantes al resultáu de la entrevista, Bermeyu esplicó que, anque'l Conseyeru se comprometió a siguir en contactu cola Asociación, nun s'obtuvo d'elli nengún compromisu en firme, y anunció que l'Asociación va siguir col so llabor de protesta y denuncia.