Les families pola escolarización del asturianu denuncien a Migoya y Riopedre

Representantes de l'Asociación de Families pola Escolarización del Asturianu dieron anuncia a Asturies.com de la presentación el mes pasáu d'un escritu de denuncia por falsedá en documentu públicu contra la Conseyera de cultura Ana Rosa Migoya y el Conseyeru d'Educación José Luis Iglesias Riopedre.

L'Asociación acusa a los dos cargos del Gobiernu asturianu de "falsedá en documentu públicu". La denuncia vien de la presentación l'añu pasáu de la campaña na qu'Educación afalaba a la matriculación n'asignatura d'asturianu. Esta campaña, amás de carteles y cartafueyos, acompañóse d'una carta que s'unvió a tolos centros y na que los responsables de les conseyeríes de Cultura y Educación afalaben a los padres a matricular a los sos fíos n'asturianu y na qu'espresaben el compromisu del executivu asturianu cola escolarización de la llingua. Dende l'Asociación de Families Pola Escolarización n'Asturianu, Arturu Bermeyu diz qu'esti compromisu "nun foi tal y que la carta nun esplicaba realidaes como'l fechu de qu'esistiere un cupu mínimu d'ocho alumnos pa poder tener clas d'asturianu o qu'esistieren centros que nin siquiera ufiertaben la posibilidá de solicitar asturianu nos sos impresos de matrícula" fechu que tamién denunciare nel so día la Xunta Moza.

Arturu Bermeyu, representante de Families pola Escolarización del Asturianu, esplicó a Asturies.com que too ello "pue suponer un delitu de falsedá en documentu públicu "por dar por garantizáu na carta un derechu que dempués nun se podía exercer" y declaró que la so intención yera interponer una denuncia énte la xusticia convencional por esti asuntu contra los dos conseyeros, pero la condición d'aforada d'Ana Rosa Migoya en cuantes que diputada na Xunta Xeneral obligó a recurrir directamente al Tribunal Superior. Bermeyu declaró que se daríen por satisfechos "con que'l tribunal estimare la denuncia y consiguiéremos sentar en xulgáu a los dos conseyeros, independientemente del resultáu del xuiciu"