Les Escuelines y la normalización: ente l’enfotu y l’escepticismu

La Xunta pola Defensa de la Llingua Asturiana (XDLA), Iniciativa pol Asturianu y ‘Reciella. Families pol Asturianu’ valoren p’Asturies.com el proyeutu de Les Escuelines, la rede de 0 a 3 años, y esplíquennos les sos esixencies.

El xueves pasáu salió a esposición pública l’anteproyeutu de ‘Lei por la que se regula la Red Autonómica de Escuelas Infantiles’, pa la etapa de 0 a 3 años d’Infantil. Ésta afita’l nome de Les Escuelines pa la mesma, pero nun contempla la llingua materna nin la diversidá llingüística.

Les organizaciones consultaes por esti diariu dixital ven la llegada de Les Escuelines como una oportunidá, pero tamién tienen duldes sobre la presencia que van tener les dos llingües propies nun ciclu como’l d’Infantil, onde tán ausentes nel currículum. “Ye un tema fundamental porque ye llevar la educación pública de 0 a 3 a zones onde agora nun l’había y onde l’asturianu ye la llingua materna de munchísimos neños y neñes”, espresa Reciella, que diz tar “esmolecíos porque nel currículum de 0 a 3, que ye’l que supuestamente se va aplicar neses escueles, la presencia del asturianu ye práuticamente nula. El currículum de 0 a 3 habría que cambialu”.

“En principio’l currículum que rixe la etapa de 0 a 3 ye’l mesmu que’l de la segunda etapa d’Infantil y nesi currículum nun apaez l’asturianu pa nada”, espresa al respeuto Carlos Pulgar, voceru de la XDLA, que recuerda que “na de 3 a 6 onde hai presencia del asturianu ye por una cuestión de mera militancia de determinaes profesores y families que tán tirando d’ello. Pero nun tien nenguna presencia regularizada”.

“Somos partidarios de lo que diz la Llei d’Usu, que tea en toles etapes educatives y que se tien que garantizar la voluntariedá de l’asignatura. Entendemos que ye una etapa más del sistema educativu, una etapa más qu’asume, faise responsable, el Gobiernu d’Asturies, y que polo tanto tien que tener la mesma presencia qu’en Primaria o Secundaria. Ye un procesu educativu continuu y debería tar presente”, apunta mentes Iván Llera, presidente d’Iniciativa pol Asturianu.

Pulgar insiste en que “el primer pasu ye incluyir dientro’l currículum d’Infantil la enseñanza del asturianu per un llau, ye dicir, el conocimientu del idioma, y tamién l’atención a aquelles families que quieran recibir esa educación n’asturianu y l’atención a aquellos neños y neñes que tengan como llingua materna o llingua de casa l’asturianu. Polo tanto, hai que modificar el currículu y incluyir l’asturianu nesi currículum; nun se pue dexar al debalu y que dependa de la voluntariedá de dalgunes persones”.

Formación del profesoráu

Reciella pon tamién el focu en que “ye mui importante, y eso tien que garantizalo l’Alministración, que les persones que vayan a dar clase neses zones y neses escuelines tengan formación llingüística, esto ye, que sepan asturianu o gallego-asturiano, que conozan les variantes de la zona. Y ye fundamental, aparte d’un mandatu de la UNESCO, que los neños y neñes que tenga l’asturianu o’l eonaviegu como llingua propia que sía la llingua d’escolarización. Nun val con que-yos enseñen cuatro pallabres, tien que ser la llingua vehicular; tienen que tener la enseñanza nesa llingua, porque neses edaes ye una cuestión de socialización, non de conteníos”.

Por ello ye necesario “un profesoráu que sepa xestionar esa realidá llingüística, que se garantice que la llingua vehicular del que tenga l’asturianu como llingua materna va ser l’asturianu, y que s’aplique al traviés d’un currículum afayadizu. Incluso, si nun se toca’l currículum, pue garantizase igual”, considera esta organización de families que trabayen p’asegurar la tresmisión xeneracional del idioma.

“Entiendo qu’esta rede naz d’una manera un poco particular porque había conceyos que yá taben asumiendo esi llabor, entós yá hai profesoráu, mayestros contrataos”, espresa Llera, qu’asegura que “dar formación a esi personal que yá hai entendemos que ye fundamental”, un aspeutu que, señala, se trató na xunta de la Conseyería d’Educación cola Academia de la Llingua Asturiana a pidimientu de la institución, con bona disposición per parte del Gobiernu. “Hai qu’intentar afitar que la llingua asturiana y la eonaviega na so zona tean presentes neses escueles, afitar l’idioma maternu, el que vien de casa, ente los más pequeñinos, y que nun seya la llingua de la escuela distinta de la que se fala en casa, que ye lo que ta pasando”, añade.

“Debería facese como nel restu de les etapes”, señala Pulgar, “primero facer formación del profesores especialistes d’asturianu y dempués dir afondando nesa vía que se paró en seco va unos años, que yera establecer pan pilotos d’usu vehicular del idioma. Hai qu’ufiertar a les families non sólo’l qu’en toles etapes puedan disponer de los estudios d’asturianu al traviés d’una asignatura, sinón qu’esistan centros que puedan disponer d’un usu vehicular del idioma pa distintes asignatures”, cuestión que tamién cita Iniciativa pol Asturianu.

Esta entidá recuerda que nel Plan de Normalización Llingüística de Xixón incorporóse nel so momentu un puntu qu’afalaba al Conceyu a facer un plan pilotu del asturianu como llingua vehicular nes escueles infantiles, “y nesti casu retiróse porque yera una competencia del Principáu”. “Sería una bona manera de probar, con voluntariedá pa les families y los centros, y depués analizalo y ver los resultaos”, afirma.

Socialización y nome n’asturianu

Dende la XDLA consideren que Les Escuelines “ye una bona oportunidá de normalización del asturianu” y rescamplen que “ye una etapa mui importante sobre too p’aquellos que tovía tienen en casa un usu patrimonial; que vean que nel sistema educativu, non tanto polos conocimientos que s’imparten esos niveles, que ye más una cuestión de socialización, que l’asturianu ye una llingua normal d’Asturies y que van poder siguir conociéndola y deprendiéndola a lo llargo del so pasu pel sistema educativu”.

“Nun ye una etapa na que se vaya a estudiar, sinón a facer otru tipu d’actividaes. Qu’haya llibros n’asturianu contribuiría muncho a que puedan facer eses llectures de cuentos n’asturianu, sería lo deseable, que s’incorpore l’asturianu y l’eonaviegu con total normalidá dientro de l’actividá de lo que ye Les Escuelines”, espresa Llera, que pon enfotu nos materiales confirmaos por Educación a l’ALLA pa llevar a les aules y espacios educativos.

“Entendemos que’l fechu de que se punxera nome n’asturianu ye bon entamu y vamos a confiar en que toos estos compromisos que ta adquriendo la conseyería se materialice, porque al final va ser bono pa los neños, primero, y pa la llingua asturiana tamién”, añaden dende Iniciativa pol Asturianu, qu’apunta tamién que “yá que’l Gobiernu va facer escueles nueves, l’asturianu y l’eonaviegu han tar presentes nel paisaxe llingüísticu d’elles: rotulación, cartelería, los nomes… Tienen que tener en cuenta esa realidá llingüística”.

“Lo importante sería que s’aprovechase esta ocasión d’ampliación del sistema públicu educativu pa tratar l’asturianu como tien que ser, como se debería de tratar n’otros niveles y que tampoco se fai”, sentencia Pulgar.

Na semeya, aula d'Infantil en Santalla d'Ozcos.