Les entraes físiques pa 'La banda sonora de la oficialidá' yá tán disponibles a 5 euros

L'espectáculu va servir pa presentar el discu-llibru de mesmu nome col que la Xunta pola Defensa de la Llingua Asturiana festexa los 30 años del históricu Conciertu pola Oficialidá.

El 14 d'avientu, a les 19 hores, l'avilesín Teatru Palacio Valdés va acoyer 'La banda sonora de la oficialidá', un acontecimientu especial nel que van participar artistes qu'actuaron en dalguna ocasión na cita añal qu'entama'l coleutivu cívicu pa reivindicar la oficialidá del asturianu. Anabel Santiago, Delfo Valdés (La Tarrancha), Mariluz Cristóbal, Rodrigo Cuevas, Miguel Fernandi 'Burilo' (Skama la Rede) y Ramón Blanco (Los Berrones) son los nomes hasta'l momentu confirmaos.

Dende güei yá tán a la venta de forma física les entraes pal espectáculu, con un preciu de 5 euros. La Xunta pola Defensa de la Llingua Asturiana (XDLA) distribuyóles n'Avilés, n'El Cafetón, El Cabanón y El Calendoscopio; n'Uviéu, n'El Esperteyu y nel Lord Vader; en La Pola Siero, n'El Cuévano; en L'Entregu, nel Centru Social Autoxestionáu La Semiente; en Mieres, en La Llocura y L'Abellugu; y en Xixón, nel Trisquel y na Canteli.

Tamién se pueden mercar dientro de les recompeses de la campaña de cuestación popular na rede entamada'l día 5 pa financiar la espublización del discu-llibru. Hasta'l momentu yá se recaudaron 2.657 euros de los 4.000 necesarios.