Les empreses qu’usen l’asturianu van siguir contando con un espaciu na FIDMA

Iniciativa pol Asturianu va caltener el so puestu na Feria Internacional de Muestres d’Asturies (FIDMA), que va organizase esti añu depués de la imposibilidá de facelo nel anterior pola pandemia. El stand d’esti coleutivu dexa espaciu pa les empreses del país qu’usen l’asturianu pa que presenten los sos productos y servicios.

‘Empreses pol asturianu’ contó cola participación de catorce firmes nel 2019: Ediciones Trabe, Saltadera –desaniciada llueu de la incorporación del so editor, Antón García, a la direición xeneral de Política Llingüística, col son fondu editorial xestionáu agora por Trabe–, Cuatro Gotes Producciones, Cartonajes Vir, Cerveza Caleya, Círculo Gijón Baloncesto y Conocimiento, Puru Remangu, La Gijonesa, La Naveta, Nenyuri xestión cultural, Los Caserinos, 9mil Soluciones, Asturcón y Acuto Xuegos. Pa la LXIV FIDMA éstes y otres firmes van tener la posibilidá de dase a conocer nesti escaparate que crea Iniciativa pol Asturianu.

D’esta forma pretende facer llegar a la ciudadanía “que l’asturianu ye un elementu de creación empresarial, xenerando actividá económica, puestos de trabayu y, polo tanto, riqueza”. Tamién amosar que “la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses”.

Axenda solidaria pa maestros

La organización tamién va aprovechar pa dase a conocer, captar socios nuevos y presentar los sos materiales. Como novedá, va poner a la venta la ‘Axenda pa profes n'apuros’ qu’edita dos maestres catalanes.

Tien un preciu de 16 euros p’asociaos y de 19 euros pal restu de persones, tando tamién disponible na oficina d'Iniciativa pol Asturianu nel Hotel d'Asociaciones del Conseyu de Mocedá de Xixón, de llunes a viernes de 10 a 13 hores, y en Cuatro Gotes Producciones n'horariu d’oficina, amás de poder encargase peles víes habituales de comunicación del coleutivu. La FIDMA va desendolcase del 7 al 22 d’agostu con control d’aforu y el puestu de ‘Empreses pol asturianu’ va siguir nel pabellón ferial númberu 3.

Na semeya, puestu d'Iniciativa pol Asturianu na edición última de la FIDMA.