“Les crisis qu'encaramos nun almiten más retrasos y les propuestes verdes contienen soluciones”

|
Semeya de familia de Los Verdes Equo Asturies

Los Verdes Equo Asturies renueven la so Mesa de Coordinación.

El pasáu fin de selmana, foi la presentación de la Mesa de Coordinación nueva de Los Verdes Equo Asturies. Los nomes de les ocho persones foron escoyíes poles bases por votación telemática “consolidando asina'l so futuru”. Na asamblea del partíu ecofeminista intervinieron el secretariu xeneral de l'Agrupación Municipal Socialista d'Uviéu, Ivan Piñuela, y Carolina Hevia, de Más Asturies.

Nel alderique, destacaron la idea de que les propuestes verdes sobre la transición enerxética “amuesen agora tola so trescendencia, énte l'alza de precios de la enerxía impulsaos pola invasión rusa d'Ucrania”. La coportavoz saliente de Verdes EQUO, Matilde Güerta, afirmó que "les crisis qu'encaramos nun almiten más retrasos y les propuestes verdes contienen soluciones que se van caltener nel tiempu, en llugar d'apaños o parches”.

L’oxetivu fundamental pa Verdes Equo ye la representación institucional porque “l'espaciu que representa, abiertu, participativu ya inscritu na acción común del Partíu Verde Européu, ye nestos momentos imprescindible nel escenariu políticu”. Poro, l'asamblea del partíu alcordó que la nueva Mesa de Coordinación “impulse un procesu pa esplorar les posibilidaes de construyir un espaciu ampliu qu'arrexunte electoralmente a delles formaciones polítiques que puedan ponese d'alcuerdu nun programa compartíu sobro la base del respetu mutuu”.

Nos próximos díes va axuntase la nueva Mesa de Coordinación, pa escoyer a les persones que van desempeñar el cargu de coportavoz, una muyer y un home, una carauterística de la formación ecofeminista dende la so fundación, na llínea del restu de partíos verdes europeos.

Contador Estadistiques