Les comunidaes autónomes acepten reducir el déficit al 1,5 por cientu

Toles comunidaes, a esceición d’Andalucía, Canarias y Catalunya, aceptaron reducir el déficit al 1,5 por cientu a pidimientu del Gobiernu estatal. IX d’Asturies alerta que la mengua ye imposible ensin recortes en sanidá y educación.
 
Nel Conseyu de Política Fiscal y Financiera (CPFF) celebráu ayeri namái s’opuso a esta midida entamada pol Executivu de Rajoy Andalucía, mentes que Canarias y Catalunya astuviéronse na votación. D'esta manera, les comunidaes acepten rebaxar al 1,5 por cientu’l déficit autonómicu esti añu y cumplir asina col programa d'estabilidá nuevu col que'l Gobiernu pretende reducir el déficit públicu del 8,5 por cientu del 2011 al 5,8 por cientu.
 
Cristóbal Montoro, ministru de Facienda y Alministraciones Públiques, consideró "mui positivu" el resultáu del Conseyu porque manda un "mensaxe de confianza nidiu" al demostrar que toles alministraciones comprométense a reducir el saldu negativu de les cuentes públiques. Al so paecer, la votación manda un bon mensaxe a ciudadanos, axentes económicos, socios europeos y inversores internacionales. "Toes entendiéronlo menos una", señaló Montoro tres llamentar la decisión d’Andalucía de refugar la midida propuesta pol Executivu estatal. Sobre la postura de Canarias y Catalunya, esplicó que los dos terrtitorios quieren conocer primero’l Presupuestu del Estáu qu’aprobará’l Gobiernu’l 30 de marzu y que calificó de "austeru".
 
Otra manera, el CPFF dio lluz verde al mecanismu pa financiar les deudes pendientes con proveedores. Según Montoro, trátase del mecanismu "más ambiciosu" que se punxera en marcha nel Estáu pa cumplir coles deudes comerciales derivaes d’exercicios anteriores. Esti mecanismu aprobóse por unanimidá y ye "mui paecíu" al que se diseñó pa los ayuntamientos, de manera que tamién tará condicionáu a los planes de saneamientu que diseñen les comunidaes autónomes, anque empezará a funcionar un poco más tarde.
 
IX d’Asturies avisa de les consecuencias de la mengua de 500 millones
 
Jesús Iglesias, candidatu d’IX a la presidencia del país, alvirtió güei qu’Asturies nun podrá asumir el recorte de 500 millones d’euros que supondrá llendar el déficit nacional al 1,5 por cientu del PIB "ensin tocar la sanidá, la educación y les prestaciones sociales". Na su opinión, ye "imposible dafechu" nun menguar estes partíes que, insistió, cobren una importancia especial nel contestu actual de crisis. Asina, argumentó que d’un presupuestu total de 4.000 millones d’euros eliminar 500, “y depués de les midíes d’axuste yá aplicaes", tocará "terminaciones nervioses mui sensibles pa los asturianos".
 
Por último, añadió que, de ser presidente del Executivu asturiano, "nun aceptaría esi techu" de gastu. "Y cuéstame creer que dalguien que construyó el so discursu políticu pretendiendo ser rexonalista lu acate", señaló en referencia a Francisco Álvarez-Cascos.