Les cases de bicicletes aprovechen el tirón de L'Angliru

L'altu l'Angliru ye a estes altures ún de los cumes más famosos del mundu gracies a los finales d'etapa de la Vuelta Ciclista a España que se ficieron ellí. El conceyu de Riosa, que fizo un apueste mui grande por poner esti monte como ún de los referentes del ciclismu mundial, quixo tamién que la montaña sirviere de motor de desarrollu pa un conceyu castigáu pola crisis y el pieslle de l'actividá minera. Amás de convertir el monte en referente turísticu, símbolu y banderín d'enganche pa facer bien d'actividaes, el conceyu tomó la precaución de rexistrar el nome de l'Angliru na oficina de patentes, pa que si daqué empresa quería aprovechar el tirón de L'Angliru tuviere que repartir col conceyu. Ello foi qu'a les cases de bicicletes falto-yos tiempu pa sacar modelos baxo la denominación Angliru, pero ficiéronlo ensin contar col conceyu. L'ayuntamientu de Riosa tien agora en manes d'un equipu d'abogaos el ver qué pue facese cola marca italiana Pinarello, que l'añu pasáu presentó la "Pinarello Angliru". La intención del ayuntamientu ye conseguir que la marca-y pague al conceyu una cantidá simbólica (alredor del 5%) por cada bicicleta que venda d'esti modelu, que s'enxerta na gama media-alta del fabricante tresalpín. Otramiente, Asturies.com punxo en conocimientu del alcalde de Riosa la esistencia d'una segunda bicicleta "Angliru" esta de la casa italiana Triestina Wilier, menos popular que la Pinarello porque nun tien distribuidor n'Asturies pero que vende col nome de la montaña asturiana un auténticu "cañón" de bicicleta. Nel ayuntamientu de Riosa nun sabíen d'esti modelu, qu'afalamos a conocer na web a los aficionaos al ciclismu. La bicicleta de marres presenta cuadru en tubería d'una aleación que presumen de que la sacaron los rusos cuando la guerra fría, elementos en fibra de carbono y componentes de primerísima calidá. El preciu, cásique meyor non preguntalu.