Les Carboneres gana’l ‘Samartín de les Tortielles’, eventu qu’algamó les 5.000 raciones vendíes

La ‘Tortiella de picadiellu al quesu de Pría’ de Les Carboneres, de Sotrondio, llevóse’l ‘Samartín de les Tortielles’, eventu gastronómicu que tien l’asturianu como llingua vehicular. Nos trés díes de certame vendiéronse 5.000 raciones.
 
“El resultáu final de ventes, con cerca de 5.000 raciones de tortiella degustaes, el bon ambiente y la sensación de que esti tipu d´eventos gusten, y muncho, a la población, sirvió pa que la mayoría de los 19 establecimientos participantes tuvieren contentos colo acontecio la fin de selmana pasao”, espliquen los Empresarios y Comerciantes de Samartín del Rei Aurelio (ECOSAM), que pretenden continuar “fomentando la creatividá gastronómica y impulsando a la hostelería local asociada pa que, añu tres añu, meyore y se modernice”.
 
Ente los 19 establecimientos de Sotrondio, Blimea y L’Entregu que concursaron nesta primer edición hubo propuestes de gran calidá, anque la tortiella que más prestó al públicu –la votación foi popular previa preba del productu de, al menos, cuatro chigres– foi pa la de picadiellu al quesu de pría de Les Carboneres, llocal sotrondín que yá lluz el diploma de ‘Meyor tortiella 2012’. Según les cifres aportaes por ECOSAM, el 16 por cientu de les persones apostó por esta tortiella, mentes que la segunda clasificada quedóse nun 12 por cientu y otres seis, con un 8 por cientu de media caúna.
 
Al igual qu’asocediera con ‘Samartín del Pinchu’, eventu precursor del dedicáu a la tortiella, la participación nel concursu del públicu al traviés de los votos tien premiu. Nesta ocasión, sorteáronse dos vales de 100 euros pa gastar nos establecimientos asociaos a ECOSAM y los afortunaos foron Germán y Sira.
 
Na semeya, Pablo Fernández, de Les Carboneres, recueye’l diploma acreditativu de manes de Ricardo González, miembru de la Xunta Direutiva d’ECOSAM.