Les candidatures provisionales de la coalición d'IX, IAS y Más País nun inclúin la toponimia asturiana

Nes de les Nacionales apaez como ‘Convocatoria por Asturias IU-Más País-IAS (IU-Más País-IAS)’ y nes de les municipales emplégase la forma castellanizada del conceyu.

La toponimia asturiana nun apaez nel nome de la coalición que conformen Izquierda Asturiana (IAS), Izquierda Xunida (IX) y Más País. Los dos primeros sí la emplegaren va cuatro años cuando se presentaron como ‘Asturias por la Izquierda-Asturies pela Izquierda (IU-IAS)’, tamién nos conceyos.

Nesta ocasión, amás del usu xeneral de 'Asturias' nel primer llistáu de candidatures espublizaes poles Xunta Eleutoral d'Asturies esta mañana nel Boletín Oficial del Principáu d'Asturies (BOPA), tamién se pue ver nomes como 'Convocatoria por (Gijón)', 'Convocatoria por Oviedo', 'Convocatoria por Lena' o 'Convocatoria por Grado'. En dellos apaecen como 'Convocatoria por (nombre del concejo) IU-Más País-IAS (IU-Más País-IAS)'', como asocede en Cabranes o Allande, ente otros.

Por contra, en Ribeseya, onde va con Pueblu, sí se respeta la toponimia asturiana y la coalición rexistróse como 'Pueblu-Convocatoria por Ribeseya (IU-Más País-IAS)'. Asocede lo mesmo n'Eilao, onde apaez como 'Convocatoria por Eilao IU-Más País-IAS (IU-Más País-IAS)'.

Previsión d'igualo

Asturies.com púnxose en contautu con IX y IAS pa entruga-yos por esta cuestión, obteniendo entrambos casos la confirmación de que se rexistrara tamién el nome 'Convocatoria por Asturies'. Al tratase d'una llista provisional la espublizada nel BOPA, les candidatures tienen plazu pa la igua d'errores, y dende la formación asturianista apunten que los que tienen que ver cola toponimia "subsanaránse".

Nel documentu de constitución de la coalición, disponible na web de la Xunta Eleutoral, ésta ta rexistrada como 'Convocatoria por Asturias IU-Más País-IAS', anque un documentu facilitáu por IAS a Asturies.com de presentación de la candidatura pa la circunscripción central apaez como 'Convocatoria por Asturies IU-Más País-IAS'. Esti partíu responsabiliza a l'Alministración del error y afirma qu'en tolos casos los papeles firmáronse cola toponimia asturiana.

NOTA: El titular orixinal 'La coalición d'IX, IAS y Más País escaez la toponimia asturiana' editóse a la espera de confirmación de si la non inclusión de la toponimia asturiana nes candidatures presentaes a conceyos ye un error o foron presentaes asina polos representantes de la coalición.

Na imaxe, captura del BOPA de la candidatura p'Asturies y Xixón de Convocatoria colos siete primeros de les llistes.