Selmana de les Lletres Asturianes

Les bases d'IX d'Asturies dan el preste al pautu eleutoral con Podemos

|

Namái un 64,9 por cientu sofita l'alcuerdu cuando nel Estáu failo un 87,8 por cientu. Les bases d'EQUO tamién apoyen el pautu.

Asturies foi'l territoriu onde los afiliaos d'Izquierda Xunida (IX) menso sofitaron un pautu que nun acaba de prestar a la direición asturiana d'IX pola posición que van ocupar nes llistes eleutorales: terceru na del Congresu y suplente na del Senáu. Ello ye qu'una comisión nomada pola presidencia colexada d'IX pa treslladar a la direición federal los pidimientos d'Asturies a Madrid reúnese güei na capital castellana col secretariu d'organización federal, Adolfo Barrena, pa que renegocie con Podemos la llista por Asturies.

A esta postura hai que sumar la contraria dafechu de Gaspar Llamazares, que vien dende hai tiempu condendando esti pautu al entender que perxudica a la coalición. Lo cierto ye qu'Asturies ye'l territoriu onde menos apoyos algama l'alcuerdu con Podemos, al sumar un 64,9 de votos a favor, cuando nel conxuntu del Estáu algamó un 87,8 por cientu.

Un 92 por cientu ente los afiliaos d'EQUO

El resultado na consulta entamada por EQUO sobre l'alcuerdu con Podemos y IX foi del 92 por cientu a favor, frente a un 6 por cientu de votos contrarios y 2 por cientu d'astenciones. “L'afiliación apostó pol cambiu, y nun duldó n'apoyar un alcuerdu que representa una oportunidá real pa poner en marcha el nuesu proyeutu políticu nuevu y tresformador que dea solución a los problemes principales de la xente. Apostamos pola suma pa ganar", aseguró Rosa Martínez, covocera estatal de la formación ecoloxista.

 

Contador Estadistiques