Les Aules Populares d’Avilés siguen marxinando les temátiques asturianes na so programación

|
Les Aules Populares d’Avilés siguen marxinando les temátiques asturianes na so programación

Somos Avilés torna a criticar la programación d'esta edición de les Aules Populares d’Avilés (AUPA) pola presencia práuticamente nula d’actividaes de temática asturiana y pol escesivu preciu de los cursos. Nesta edición, de los 90 programaos, namái hai dos que traten sobre aspeutos concretos de la nuesa cultura.

Concretamente, céntrense nel teatru n'asturianu y na historia y patrimoniu d'Avilés y el so alfoz, mentes que’l restu van dende les sevillanes (aniciu y afondamientu), los bailles de salón, el tangu, la salsa o mesmamente'l baille Bollywood, a temes históricos como la Revolución Francesa o idiomes como’l francés, l’inglés y l’alemán. “Somos conscientes de que la variedá de la ufierta formativa d'AUPA ye parte fundamental del so atractivu, pero ello nun ye disculpa pa marxinar descaradamente, añu tres añu, les actividaes centraes nel propiu territoriu, imprescindibles pa facer una ciudadanía más responsable col so entornu”, apunten dende Somos Avilés.

Nesi sen, soliciente actividaes onde l'arqueoloxía, la historia, la ecoloxía, el folclor, la cultura o la llingua asturiana sían protagonistes. “L'interés pol mundu escomienza pola conocencia, apreciu y respetu polo más cercano y propio”, afirmen.

Cursos de más de 100 euros

La candidatura de xunidá popular entiende que la Conceyalía de Cultura “nun se pue esconder baxo la premisa de que nun hai demanda pa esti tipu de materies, y ello porque precisamente ye la responsable de promocionar, divulgar y facer un trabayu previu de concienciación sobre toes estes temátiques que tengan a Avilés y Asturies como oxetu d'estudiu, amás d'especificar nes bases de convocatoria pa les empreses interesaes n'impartir y organizar el programa d'AUPA qu'han tener en cuenta esta cuestión”. Esta supuesta falta de demanda, consideren, tamién vien pol costu de les matrícules, que pueden superar los 100 euros, cuando en conceyos vecinos como Corvera “los interesaos pueden asistir, por exemplu, a un cursu de llingua asturiana y d'otres materies de manera gratuita”.

Contador Estadistiques