Les alternatives polítiques de la tierra

Asturies vien dependiendo de los grandes partíos estatales pa gobernase. De les cinco llexislatures que llevamos dende 1983, cuatro foron con mayoríes socialistes, una dinámica que namás franció nel 95-99, cuando la mayoría parcial del PP dio llugar a un pactu ente'l partíu d'Aznar, y un partíu autonómicu, el PAS, pa garantizar el gobiernu.

Esti añu, toles encuestes-y dan la mayoría absoluta al PSOE, colo qu'Asturies vien a confirmar que se desmarca de la corriente estatal que nació a mediaos de los 90 de partíos autonómicos que condicionaron la gobernabilidá de los sos territorios. Sicasí, la vida sigue más p'allá del Payares, y otres cinco comunidaes autónomes van depender seguramente de formaciones d'ámbitu autonómicu pa poder facer gobiernu. N'Aragón, Baleares y Canaries, y pue qu'hasta Baleares y La Rioxa, delles formaciones polítiques autonomistes, con discursos políticos que van dende'l rexonalismu a postures más nacionalistes, y qu'ocupen llugares bien distintos na escala izquierda-derecha, van ser claves nes formaciones de gobiernu.

En Canaries, Coalición Canaria, la fuerza mayoritaria nel archipiélagu, vien dende 1.995 llegando a pactos cola fuerza qu'ocupe'l poder nel estáu, primero PSOE y depués PP, una táctica que ta rindiéndo-yos enforma a les islles, que reciben dende 1995 un aporte presupuestariu como nunca nun conocieron.

N'Aragón, el Partido Aragonés (Par) vien faciendo otru tanto pero al revés, pactando primero con populares nel 95 y depués con socialistes nel 99, añu en que''l PAR algamó 10 diputaos y los socialistes 13. La política del PP col Plan Hidrolóxicu va menguar de xuro'l votu del partíu d'Aznar n'Aragón, colo que se tien cásique por seguro que va repetise l'alianza Par-PSOE, pero la novedá va tar nel afitamientu de la Chunta
Aragonesista, la formación aragonesista d'Izquierdes que pue llegar tamién a delles estayes de poder y metese con representación en conceyos importantes

Nes Islles Baleares, la centristaUnió Mallorquina (UM), tamién lleva gobernando por temporaes colos mayoritarios PP y PSOE. Con namás 3 escaños, UM foi la llave nel 99 pal gobiernu ampliu del Pacte Progessista nel que manda'l socialista Francesc Antich y nel que tamién tan representaos PSM-Entesa Nacionalista, Izquierda Unida y Els Verds.

Tamién en Cantabria los partíos d'ámbitu autonómicu tienen muncho que rascar. Ente los nuestros vecinos orientales, el Partido Regionalista de Cantabria (PRC), de Miguel
Ángel Revilla tuvo tamién nel 99 la clave pal gobiernu autonómicu colos sos seyes escaños, que pactaron colos 14 del PP. Lo más fácil ye que repitan.

En cuantes a La Rioxa, el Partido Riojano (PR), con dos escaños anguaño, ta a ver que pasa colos dos partíos mayoritarios pa convertise tamién en clave del gobiernu. N'autonomía manda'l PP cola mayoría absoluta qu'algamó nel 99, pero les encuestes mengüen el votu de los populares y inflen el de los socialistes, colo que, de nun haber mayoría absoluta, el PR va ser la llave del gobiernu.