Les alcaldíes manden nel debate PSOE-IX

PSOE y Izquierda Xunida-Bloque por Asturies retomaron ayeri les negociaciones p'algamar alcuerdos que permitan gobernar conxuntamente a dambes fuerces a nivel autonómicu y municipal. L'aconceyamientu d'ayeri siguió tola mañana de güei cola gobernabilidá a nivel de conceyos como tema protagonista, mientres que l'alcuerdu pa gobernar Asturies entovía nun s'abordó en serio, al dicir de Rafael Palacios, representante del BPA na mesa de negociaciones.

La falta de que les corporaciones municipales tean compuestes pal día 14 ta centrando les conversaciones sobre esti particular, mientres que no que cinca al alcuerdu pa gobernar Asturies namás ta faciéndose una llectura de programes pero ensin entrar a discutir puntos concretos. Na cuestión de los conceyos, FSA-PSOE y IX-BPA articulen l'alcuerdu al través de tres tipos de conceyos, siempre col enfotu común de torgar la entrada del PP a les alcaldíes. En primer llugar, n'aquellos conceyos onde la llista más votada seya la d'IX o la de PSOE, la otra fuerza daría'l votu p'afitar el gobiernu de la primera.

En segundu llugar taríen los conceyos onde la llista más votada seya'l PP pero la xunta d'IX y PSOE dea la mayoría. Cinco conceyos tan nesta situación. D'una parte Castrillón y Casu, onde d'haber alcuerdu l'alcaldía diba ser pa IX y d'otra parte Avilés, Morcín y Teverga, que tendríen rexidor socialista. En tercer llugar, los representantes d'IX y PSOE trataron l'asuntu d'aquellos conceyos onde tendríen falta de llegar a alcuerdos con terceres fuerces pa poder llegar a l'alcaldía, citando los casos de Carreño y Bimenes, conceyos nos que tienen representación política hasta seyes partíos, pero nesti grupu de conceyos pesa sobremanera Siero, onde pue repetise'l tripartitu PSOE- IX-Conceyu que gobernó estos cuatro años