Les actividaes de la XV Fiesta de la Oficialidá de la Llingua Asturiana van principiar el 22 de xunu

Bimenes yá zarró'l programa de la Fiesta de la Oficialidá de la Llingua Asturiana. La esposición del concursu de cómic n’asturianu va abrir les actividaes el 22 de xunu, anque la folixa va desarrollase la primer fin de selmana de xunetu.
 
La Casa Cultura de Santuyano ye’l sitiu que va acoyer, ente’l 22 de xunu y el 6 de xunetu, n’horariu de 16 a 20 hores, la esposición de les obres presentaes al VII Concursu de Cómic n’Asturianu de la Mancomunidá de la Sidra, una actividá na que collaboren los Servicios de Normalización Llingüística, Cultura y Mocedá de la Mancomunidá de la Sidra. Nel mesmu llugar, el llunes 27 a les 19.30 hores, va presentase el llibru ‘Cánigu lliterariu’ y va celebrase una llectura de testos na llingua’l país por parte d’autores de la zona. Tamién van abrise les pliques del XIV Concursu de Cuentos pola Oficialidá del Asturianu.
 
Al día siguiente, a la mesma hora, va proyeutase ‘Los viaxes de Gulliver’, una de les primeres cintes doblaes al asturianu, obra de Gonzali Producciones. Los responsables d’esti trabayu van esplicar a los presentes cómo ye’l procesu pa doblar una película al nuesu idioma. Ente les actividaes de la XV Fiesta de la Oficialidá de la Llingua Asturiana tamién hai espaciu pal teatru costumista. En concretos, los yerbatos y visitantes van poder disfrutar de la representación de ‘Xuacu y Telva’ pol grupu de teatru ‘El Hórreo’, de Barcia (Valdés). Va ser el xueves 1 de xunetu, a les 20.30 hores na Casa Cultura de Santuyano.
 
Mentes, el vienres, a les 19.30 hores, va celebrase la entrega de premios del Concursu de Cuentos y la llectura pública de la obra ganadora por parte del so autor o autora. De siguío, alredor de les 20.30 hores, va ser el tiempu del humor de la mano de Ludivino Díaz González, ‘Pin de la Cotolla’, que va presentar el so espectáculu ‘Cotollaes’.
 
El sábadu, día grande d’esta folixa que conmemora l’aprobación nun Plenu de la oficialidá de la llingua asturiana nel conceyu yerbatu –torgáu llueu pol Tribunal Constitucional–, los actos de la mañana van treslladase a Martimporra, a la Casa Conceyu. A les 12.30 hores va lleese’l pregón, qu’esti añu va ellaborar Adolfo Camilo Díaz, escritor, dramaturgu y xestor cultural, pa llueu celebrar una misa n’asturianu oficiada por José Manuel García de Jesús y cantada por El Corriellu la Pandorga. Pa les 13.30 hores tán previstes les actuaciones del Ensame de Música Tradicional y del Grupu de Baille de Los Yerbatos.
 
Pela tarde, l’activá va pasar de nuevo a Santuyano cola celebración, a les 18 hores, del XII Concursu de Gaiteros y Gaiteres Mozos. Dos hores más tarde va actuar el grupu folk Na que contate y, a les 21 hores, van entregase los premios del concursu de gaiteros. Hai que destacar que nesta xornada festiva dellos restoranes del conceyu ufren un menú especial ‘Fiesta de la Oficialidá’ con platos típicos del país. Los establecimientos que participen son l’Asador Noval, Bar El Llugar, Mesón San Cipriano y Hotel El Boreal.