L’equipamientu cultural de la Villa de Veranes va inaugurase’l 19 de marzu

El yacimientu arqueolóxicu de Veranes, en Xixón, va inaugurase'l 19 de marzu, con más de 3.500 metros cuadraos d'escavaciones que treslladen al visitante a l'Asturies romana. El conceyu de Xixón invirtió más de cinco millones d'euros na restauración y reconstrucción d'esti yacimientu, nel qu'al traviés de pantalles audiovisuales y vídeoguíes, el visitante va poder conocer cómo yera la vida nuna villa romana.

Les escavaciones en Veranes entamaron nel añu 1997 dirixíes pola arqueóloga de la Universidá Autónoma de Madrid Carmen Ochoa. Los llabores descubrieron un llugar con distintes estructures y construcciones qu'entamen nes dómines postreres del imperiu romanu, espurriéndose la ocupación del llugar hasta l'alta edá media y conseñándose nel yacimientu la existencia de trabayos metalúrxicos, una basílica y una necrópolis medieval con enterramientos hasta'l sieglu XIII.

Nel so meyor momentu, alredor del sieglu IV, la villa de Veranes foi propiedá d'un aristócrata, problablemente de nome Veranius. El planeamientu de la villa recuerda a les grandes edificaciones de la roma imperial, y, según se comenta dende'l Conceyu de Xixón, dellos elementos alcontraos, casu d'un espectacular mosaicu de debuxos xeométricos asitiáu no que sedría la sala de visites de la estancia, faen rescamplar la importancia del dueñu de la casa. Asitiada na oriella de la Ruta de la Plata, delles de les instalaciones de la Villa, reconvertíes n'Ilesia, siguieron utilizándose hasta'l sieglu catorce.