L'Entregu despidió al tamboriteru Jose Luis García Castañón "Machacón"

Esti martes al mediudía morría con 85 años José Luis García "Machacón", el mayor esponente de la escuela tradicional de tamboriteros de la cuenca'l Nalón, y tamién del centru d'Asturies, xunta tamboriteros como El Xarreru, Luis Sarilles, El Borle, Bernardo Candamo, Xuanón el de Viella o Chema Castañón ente otros. Nel intierru tuvieron presentes munchos gaiteros y sobre too tamboriteros, los más d'ellos alumnos d'elli. Na misa cola que se despidió a esti gran músicu tocó'l gaiteru Valentín Fuente, col que Machacón ficiere delles grabaciones.

Jose Luis García rescampló nel mundu de la música tradicional marcando escuela en tol centru d'Asturies y sobre na cuenca onde vivía, la del Nalón. Ellí, y en toa Asturies, fízose famosu pol so toque al aru, qu'executaba coles dos manes, y pola so claridá nos toques. La precisión y calidá del toque de "Machacón" merecieron el reconocimientu de musicólogos como Julio Sánchez-Andrade, que reconocía la gran influyencia del estilu de "Machacón" nel toque de la zona central d'Asturies na so tesis doctoral sobre la percusión na música tradicional asturiana.

José Luis García tuvo una llarga vida musical, permaneciendo n'activo hasta bien pasaos los 80 años con una claridá y calidá d'execución mui d'emponderar. De cualquier manera, el so toque nun va dexar de sentise gracies al llabor docente de "Machacón" que-yos tresmitió'l so saber a munchos alumnos, rescamplando ente ellos la figura de Manolo Durán, que sigue n'actualidá tresmitiendo tamién a los sos alumnos esi toque que deprendiere de José Luis García Castañón "Machacón", maestru de tamboriteros.