L'Entregu celebra les fiestes de les cebolles rellenes

Gastronomía, folclor y folixa xúnense esta fin de selmana en Samartín del Rei Aurelio. L'Entregu celebra les fiestes de les cebolles rellenes y el XX Festival Folclóricu L'Esperteyu.

Alredor de trenta restoranes van servir dende güei y hasta'l llunes el yá tradicional menú de les fiestes de les cebolles rellenes, que vive la so edición númberu cuarenta y dos: callos, cebolles rellenes de bonitu y casadielles. Tamién hai la posibilidá de tastiar un platu únicu de cebolles rellenes. La organización calcula que nestos díes van cocinase un total de 11.000 quilos d'esti alimentu.

De forma paralela a esta celebración, va tener llugar el XX Festival Folclóricu L'Esperteyu, col grupu vascu Biasteriko Dantza Taldea (Biasteria, Araba) como convidáu. Esta actividá entámala'l Grupu d'Etnografía y Folclor L'Esperteyu y va tener llugar mañana a les 19 hores nel Teatru Municial de Samartín del Rei Aurelio, con entrada llibre. Mentes, el domingu, a la mesma hora y nel mesmu llugar, va desendolcase'l XXV Día de la Canción y el Folklore cola actuación de Arturo Cortina, Marcelino Bustamante, Alberto de Dios, Laudelina Hortal, Carlos Ronderos, el monologuista Nel Del Solo y la Bandina de Gaites Tradicional Valle del Nalón.

Tamién va haber nestos díes na programación de les fiestes sitiu pa un concursu gastronómicu, el teatru y les verbenes con DJ, previstes pa esta nueche y mañana nel Parque de la Llaguna.