L’embalse de Caliao vuelve al primer planu

Unes declaraciones del xerente del Consorciu d'Agües y del Presidente de la Confederación Hidrográfica del Norte demandando la construcción del tercer embalse nel Nalón sacaron angüeñes nel movimientu ecoloxista y nel Grupu Parlamentariu d'IX-BA.

"Asturies tien abastecimientu d'agua, pero carez de garantía pa enfrentase a un mal añu" estes foron les pallabres de Jorge Marquínez, presidente de la Confederación Hidrográfica del Norte que pidió una regulación de los calces de los ríos asturianos pa dotase d'eses garantíes, garantíes qu'Alberto Álvarez Rea, xerente del Consorciu d'Agües CADASA, materializó na construcción del tercer embalse nel Nalón, que califico de "necesidá urxente pa garantizar l'agua n'Asturies d'equí a la vuelta de venti años". Estes declaraciones producíense na inauguración del cursu de branu de la Universidá d'Uviéu "L'agua como recursu: usos, impactos y xestión. El casu del área central d'Asturies" que se desarrolla na Casa la Buelga de Ciañu - Llangréu.

Jorge Marquínez, de la Confederación Hidrográfica, prendió l'alarma sobre'l fechu de que los ríos asturianos queden en branu al 10% del caudal mediu que tienen y culpó a una serie de factores como la carga de vertíos industriales y l'espardimientu espacial de la población como factores que faen que les infraestructures actuales nun tengan capacidá p'atender la demanda d'agua que tolos años medra n'Asturies y que'l mandatariu de la Hidrográfica repartió nun 48% d'usu industrial, un 36% d'usu urbanu un 7% que s'emplega pa refrixeración y un 9% pa riegu. Marquínez sorrayó qu'hai llugares en Cantabria raspiando'l corte d'agua y qu'Asturies pue vese nuna situación comprometida d'equí a la vuelta poco.

El xerente de CADASA Alberto Álvarez Rea sorrayó les palabres de Marquínez y punxo l'embalse de Caliao como única solución a esos problemes en cuantes que l'aprovechamientu d'agua subterráneo nun se-y ve traza y en cuantes que ye preciso complementar a los embalses de Rusecu y Tañes, que dan agua al centru d'Asturies.

La construcción del embalse de Caliao ta agora mesmo nun intre de parón teóricu dende que'l mes pasáu, un alcuerdu conxuntu de les fuerces de gobiernu postergare la obra a les conclusiones d'un informe independiente que tendría d'apautar la necesidá de la mesma. Por ello, les declaraciones de los responsables de CADASA y de la Hidrográfica sacaron angüeñes nel Grupu Parlamentariu d'IX-BA , qu'emitió un comunicáu calificando d'imprudentes les declaraciones de dambos responsables en cuantes que nun hai encontu técnicu pa dicir lo que dixeron y que les sos declaraciones nun van más allá del campu de la especulación metafísica o del convencimientu personal. En cualquier casu, IX-BA dio anuncia de que va pidir, n'entamando la sesión parlamentaria en setiembre, que s'acelere la Proposición non de llei que manda la realización d'un estudiu sobre los recursos hídricos, usu y xestión del agua n'Asturies que tendrá d'encamentar o non la construcción del embalse.

Contra los intereses que defendieron siempre la construcción del embalse col argumentu de que diba ameyorar la calidá del suministru d'agua a los conceyos del centru d'Asturies, pero los ecoloxistes camienten qu'ello nun ye preciso y que pue facese con otres soluciones alternatives. Grupos conservacionistes lleven tiempu denunciando que l'agua de la cuenca del Nalón ta emplegándose cada vegada más pa la xeneración de corriente y menos pal consumu, una utilización que ye la que realmente lleva a qu'escosen les reserves del embalse de Tañes.